Tres diputado nobo a huramenta pa gobierno di Bonaire

KRALENDIJK – Diamars anochi e tres diputadonan nobo pa Bonaire a huramenta dilanti gezaghebber Edison Rijna. Despues di un crisis chikito den un di e partidonan cu ta forma parti di e coalicion (UPB), esaki tambe a keda resolvi y por a huramenta e persona aki tambe. Na final, tres diputado a huramenta, representando e dos partidonan UPB y PDB, pa e periodo di gobernacion 2015-2019.

DIPUTADONAN NOBO

E personanan cu finalmente a huramenta tabata pa demokraat, Clark Abraham y Benito Dirksz. Pa partido UPB finalmente esaki a bira Gerald Silberie, cu e dia ey a wordo acerca pa asumi e funcion importante aki. E tres personanan aki lo tin cu asumi nan responsabilidad proximamente y percura pa ehecuta e trabounan cu ta warda nan.

CRISIS UPB

E 24 oranan prome no tabata facil. Esaki ya cu prome cu diamars, e partido berde UPB a haye den un situacion sorpresivo ora cu un di su miembronan no kier a tende di entrega su posicion di partido pa habri caminda pa James Kroon asumi e funcion di diputado. Na final, atardi laat diamars esaki a keda resolvi y pa buena marcha a opta pa Kroon no huramenta mas como diputado.

DIA DI RINCON

Un di e asuntonan ‘imprevisto’ cu nan lo tin cu sinta cune ta e ‘batata cayente’ cu a hera rementa diamars anochi, ora cu durante e reunion, a bira conoci cu e conocido y popular Dia di Rincon lo no bira un dia liber oficial, debi cu minister hulandes Ronald Plasterk no a duna su aprobacion pa esaki. Cu e decision ey, e la bay liña recta contra e decision anterior di e diputado saliente sra Chirino, cu a anuncia algun dia pasa, cu esaki lo ta un dia liber pa tur boneriano.

BATATA CAYENTE

E ta un batata cayente den sentido cu tur hende a conta cu e fecha aki, a haci preparacion, y e pio cos ta cu pareha Real ta bin Bonaire netamente pa celebra e dia grandi aki. Awor cu ta conoci cu e no ta un dia liber oficial, e ta pone e diputadonan recien eligi, dilanti un situacion fastioso. E ultimo palabra di Plasterk tabata pa ‘busca un solucion practico pa e dia ey’. Kico esey kier men, no tabata conoci. Foto cortesia Stanley Balentin.