Plasterk: 'Dia di Rincon' no ta un dia liber oficialmente e aña aki!

KRALENDIJK - E aña aki, un di e dianan mas importante di e isla di flamingo Bonaire, -dia di Rincon-, no ta un dia oficialmente liber. Esaki a keda participa diamars anochi pa diputado Chirino durante reunion di conseho insular. E reunion su meta principal tabata pa instala 3 diputado nobo pa conseho insular di Bonaire. Pero a resulta cu tabatin puntonan di agenda cu mester a keda trata prome. Ta aki a bin tende e sorpresa, cu Hulanda no a duna su aprobacion pa duna e dia ey liber. Esaki a bin como un baño di awa friew pa esnan den e sala diamars anochi, y tambe comunidad. E fecha ta uno cu pa añanan tabata wordo celebra, ya cu e tabata cay tambe riba dia di aña di la Reina. Pero for di aña pasa cu Rey Willem Alexander a tuma trono, a bin cambio den e fecha aki. E aña aki, gobierno di Bonaire a participa cu e fecha una bes mas tabata uno liber. Sinembargo diamars anochi, diputado Chirino a presenta e carta cu e la ricibi, cu ta bisa cu e mandatario hulandes no a aproba e fecha aki. E ta bira un problema, mirando cu gezaghebber di e isla, Edison Rijna, a invita  Rey y Reina for di Hulanda y nan lo ta presente na Bonaire riba e fecha aki. No ta conoci kico esaki lo nifica awor y ki solucion esaki lo trece. 

Mientrastanto, e problema den seno di partido UPB (Union Patriotiko Boneriano) a keda soluciona y a reemplaza James Kroon, cu Gerald Silberie cu awor lo bira e diputado pa e partido berde. Pa e partido cora, Clark Abraham y Benito Dirksz ta bira diputado. Foto Rincon cortesia Destination360