Gobierno di Aruba ta firma MoU cu waf di Jacksonville na Merca pa carga

ORANJESTAD – E siman aki, Gobierno di Aruba ta firma MoU cu waf di Jacksonville na Merca pa un ruta nobo di carga, cu e intencion pa baha costo di bida y crea mas desaroyo economico.  Pa esaki, Prome Minister Evelyn Wever-Croes y Minister Dangui Oduber ta na Jacksonville, Florida pa reuni cu ehecutivonan di Jaxport pa firma e MoU cu Jaxport como partner strategico pa Aruba den desaroyo economico. 

Segun gobierno di Aruba, Jaxport ta interesante pasobra e ta e puerto mas grandi di container di Florida. Cu esaki Aruba y Jaxport lo explora rutanan nobo pa cargo entre Aruba y Merca, y mester bisa, menos costoso cu e ta awor. Esaki lo fortifica e terminal di cargo di Aruba tambe. 

LNG

Ademas, segun gobierno di Aruba ta splica, locual ta haci e partnership nobo aki mas interesante ta cu por ofrece na servicionan di LNG na cruceronan, cu por crea un ruta nobo di crucero entre Jacksonville y Aruba. 

Prome Minister Wever-Croes tabata na New York siman pasa y a pasa Jacksonville na caminda pa Aruba, y lo ta bek diamars. Minister Dangui Oduber lo atende e demas compromisonan e siman aki na Jacksonville pa concretisa e palabracionnan.  “Cu esaki, nos ta crea oportunidadnan nobo pa Aruba, cu por baha costo di bida y por crea mas desaroyo economico”, Prome Minister a expresa.