Parlamentario na Corsou ta sugeri pa bende droga confisca, cu Hulanda pa genera fondo

WILLEMSTAD - Un rechaso, kondena i repudio total por a tuma nota di dje riba retnan sosial den wikènt último pa disertashon di parlamentario Juniel Carolina (MFK) den parlamentu djaweps. Carolina den su disertashon riba e tema di Wardakosta, a sugirí pa bende e kokaina òf droga konfiská ku Ulanda, pasobra e ta generá sèn pa kaha di gobièrnu. Den e promé tanda di reunion, Carolina a bisa di a komprondé ku na Ulanda nan no ta destruí droga konfiská, spesialmente e kokaina. E ke sa ku ta bèrdat nan no ta destruí e droga na Ulanda. Si e kontesta ta si, e ta puntra dikon ora konfiská e droga aki na Kòrsou, segun e ta komprondé 29 mil kilo a konfiská aña pasá. Pregunta: “dikon no ta bende e droga ku Ulanda. Pasobra 29 mil kilo di kokaina tin un balor di 1650 miar riba merkado na Ulanda. Si na Kòrsou bende 1 kilo pa 500O florin nos ta yega na 175 mion. Mi ta puntra pasobra e benta lo generá sèn”. Ora Carolina a bisa esaki, tabatin miembro di Parlamentu den su serkania ku a murmurá ku enbèrdat ta sèn ta generá pa kaha di gobièrnu. Hasta tabatin parlamentario ku tabata hari i hasta por bisa gosa loke Carolina a bisa. Hasta Carolina tabata interesá pa sa si patruyamentu di Wardakosta riba laman a baha.

Minister Hato den su kontesta na Carolina a splika ku no ta bèrdat ku Ulanda no ta destruí droga. “Den mayoria pais tin fòrnu spesial ku ta ser usá pa destruí droga. Na Ulanda e droganan konfiská ta keda pisá, ta kategorisá nan i katálogá den kòmpiuter pa despues destruí nan. Benta di droga ta algu ilegal i kastigabel. Pues e proposishon di Carolina den otro palabra ta fuera di lugá. Komo titular di hustisia na ningun momentu lo mi no konsiderá pa hasi esaki tampoko”, minister Hato a deklará.

Ana Maria Pauletta tambe a reakshoná den parlamentu indikando ku loke bo papia den parlamentu no ta bai sera pe. “Un miembro di parlamentu a insinuá ku gobièrnu mester kuminsá bende droga. Mi ta pidi minister pa medio di bo sra. Presidente pa koregí i pa no laga e loke ku Carolina a bisa, bai biba su bida. Pasobra e intenshon ta tambe pa kibra Wardakosta pa “nos” kompinchinan sigui pasa droga i bende droga kuantu ku nos ke. Mihó koregí e impreshon ku kier kibra Wardakosta pa pasa droga”, sra. Pauletta a bisa.

Hopi siudadano a kondená loke Carolina a deklará, puntrando ku ta plaka di pueblo mester paga pa parlamentarionan asina. Ora bende Ulanda e droga, a pensa ku no ta e ulandes so ta bai us’é, pero yunan di Kòrsou aya tambe? A traha vidio kaminda ta chèrchè loke e parlamentario a bisa. Te na siere di nos edishon, niun hende di MFK, ni e frakshon den parlamentu, ni direktiva di e partido, ni e propio Carolina no a pidi diskulpa pa un deklarashon asina for di su lugá, manera minister Hato mes a bisa. NOTA: Texto ta scirbi den Papiamento fonetico di Corsou.