Situacion den UPB por stroba huramentacion na Bonaire awe

KRALENDIJK – Na vispera di e huramentacion di diputadonan di Bonaire, tin un crisis cu a desaroya den seno di partido Union Patriotico Boneriano (UPB). E problema ta sinta cu un candidato, # 4, Nunu Raphaela cu lo no ta dispuesto pa concede su posicion pa James Kroon huramenta como e diputado pa e partido, segun periodista Aimed Ayubi a raporta. Mes momento NoticiaCla.com a tuma contacto cu candidato pa bira diputado pa Democraat, Benito Dirksz, cu a sigura cu ‘tur cos ta continua normal’. Dirksz ta postula pa bira diputado awe tardi.

PROBLEMA

For di ayera e problemanan a surgi den e seno di e partido berde, Partido UPB lo a pidi Nunu Raphaela pa entrega su asiento ya cu ora James Kroon bira diputado, automaticamente e number 2, 3 y 4 ta drenta como miembro di conseho insular pa UPB sosteniendo e coalicion di DP y UPB. Pero parse cu e peticion di mando di UPB na Nunu a cai den masha mal tera y hasta famia nan a cai aden y a manda un mensahe bon cla na mando di UPB cu Nunu no ta entrega su asiento pa otro persona mester drenta na su luga. Pues tin reunion basta fuerte tumando lugar pa wak con ta bai remedia e situacion aki prome cu mayan cu mester ta huramentacion di e diputadonan nobo. E situacion ta dje tenso ey cu chens ta grandi cu James Kroon mes lo mester drenta conseho insular y no bira diputado mas pa por tin trankilidad den e coalicion. Foto cortesia Aimed Ayubi, cu ta mustra Nunu Raphaela na su cas ayera nochi, discutiendo e problema.