- Kes the Band di Trinidad confirma pa Flip Flop Festival na juni!
- DVG: A cuminsa hospitalisa hende localmente infecta cu Dengue
- Minister na Merca ta lobby cu banconan pa fia 160 miyon dollar
- Hulanda dispuesto pa yuda paisnan den Caribe cu asunto di refugiadonan
- WEB Aruba ta firma acuerdo cu Seven Seas Water Group pa construi planta SWRO-3
Studiantenan di Caribe awor por haña un 'BSN' prome cu yega Hulanda
DEN HAAG - Conseho di Minister di Hulanda diabierna a aproba cambio di e Decreto registracion basico di persona (Besluit basisregistratie personen) di tal forma cu awor studiantenan di Caribe por haña un BSN mesora despues cu nan entrega un peticion pa finansiamento di estudio via DUO. Esaki ta bira posibel dor di inskribí e studiantenan aki temporalmente komo no-residente den e BRP. Alexandra van Huffelen, secretario di estado di Relashonnan den Reino di Digitalisashon (BZK) a entregá e desishon den konsulta ku e minister di Enseñansa, Kultura i Siensia. Ku esaki e ta ehekutá e ambishonnan di e gabinete pa duna studiantenan di Boneiru, Saba i Sint Eustatius, Aruba, Kòrsou i Sint Maarten un BSN promé ku nan yega Hulanda. Ta entregá e desishon serka Raad van State pa konseho.
REGLA ASUNTU ONLINE MAS FÁSIL
Ku un BSN studiantenan por regla tur asuntu ku gobièrnu i otro instansia online pa kua un BSN ta nesesario. Por ehèmpel pa petishon di un DigiD, pago èkstra (toeslagen) i pa traha un afspraak na e munisipio pa inskripshon den e BRP. Di e forma aki studiantenan por prepará nan mes pa nan yegada na Hulanda i despues di yegada por atendé nan asuntu mas lihé. Asina nan no ta haña nan mes den problema innesesariamente. E desishon di Konseho di Minister ta e promé paso. Despues ku e regla drenta na vigor, mester di tempu pa ahustá e sistema di DUO.
PA STUDIANTENAN DI KARIBE KU DERECHO RIBA FINANSIAMENTU DI ESTUDIO
E kambio ta konta pa tur studiante di Karibe ku tin derecho riba finansiamentu di estudio i ku ta bai studia na Hulanda, pero ku no ta biba einan ainda. Un kondishon importante ta ku nan mester tin e nashonalidat hulandes òf igual na esaki. Studiantenan di MBO di Karibe ku no a kumpli 18 aña ainda, tambe ta risibí un BSN promé ku nan yega Hulanda. Ta konsiderá e derecho di biahe, mihó konosí komo e produkto di biahe di studiante ku nan ta risibí, tambe komo finansiamentu di estudio.
INSKRIPSHON NA MUNISIPIO DESPUES DI YEGADA NA HULANDA AINDA TA OBLIGATORIO
Despues di e desishon aki ainda studiantenan di Karibe ta obligá pa, despues di yegada na Hulanda, inskribí na e BRP di e munisipio di Hulanda kaminda nan ta bai biba. E reglamentu ta konta pa tur hende ku ta bai keda Hulanda pa un periodo di 4 luna òf mas. E BSN ta keda meskos.
POSIBEL MEDIDA ÈKSTRA NA KOMIENSO DI ESTUDIO NA 2023
Pa studiantenan di Karibe ku na ougùstùs òf sèptèmber di e aña aki ta kuminsá ku un estudio na Hulanda, no ta posibel pa hasi e kambio na tempu despues ku e desishon drenta na vigor. Nan ta haña un BSN despues di inskripshon den e BRP di e munisipio hulandes kaminda nan ta bai biba. Gobièrnu di Reino ta bai hasi esfuerso pa, den kasonan individual, eliminá e problemanan pa e studiantenan di Karibe, ku ta guia na tardansa durante inskripshon den e BRP. NOTA: Texto ta den Papiamento fonetico di Corsou.
Directora di Arubahuis a atende “Kennismissie” di OC&W na Aruba y Curaçao
DEN HAAG – Directora di Arubahuis a mr. Joselin Croes a participa na e “Kennismissie” di Minister di OC&W Robbert Dijkgraaf na Curaçao y Aruba. Na Aruba e punto central tabata con educacion ta conecta cu e mercado laboral: e situacion actual, pero principalmente con e demanda di enseñansa ta cuadra cu e necesidad di e mercado laboral.
Pareha Real Spaño a inicia bishita na Hulanda, cu participacion di prinses Amalia
AMSTERDAM – Rey di Spaña Felipe y Reina Letizia a cuminsa na nan bishita oficial di dos dia na Hulanda. E bishita a cuminsa riba plaza Dam unda cu tabatin tiro di saludo riba e tereno di marina. No a usa municion sino mas bien blanco. E diferencia di e bishita aki ta cu e biaha aki prinses Amalia tambe ta inclui den e bishita. Awe nochi e ta forma parti di e cena Real na honor di e pareha Real Spaño. Amalia tin un relacion special cu Spaña ya cu e la pasa un aña eynan recien debi na motibonan di seguridad pa su bida. Mientrastanto e la bolbe Hulanda pa biba y sigui studia. Pero e situacion di seguridad y menasa contra dje, no a kita ainda.
Decenas di buelo anula na Schiphol debi na fuerte rafaga di biento
SCHIPHOL – Decenas di buelo a keda anula dialuna na aeropuerto Schiphol di Hulanda debi na mal tempo. Ta primordialmente buelonan dentro di Europa mes. Buelonan pa Caribe Hulandes manera Aruba no a keda afecta. Ta trata di 90 buelo cu a keda anula, di cual mayoria ta di KLM. Ta spera rafaga di biento fuerte cu posibel mal tempo, segun un vocero di e aeropuerto.
Aunke interes ta minimo riba e islanan, lo sigui tene conferensia di Reino riba clima 2025
W’STAD/DEN HAAG - Minister Hulandes demishonario di Klima i Energia, Rob Jetten a anunsiá durante un reunion di e komishon fiho di Relashonnan den Reino di parlamento Hulandes ku na 2025 ta organisá e di dos konferensia di klima di reino na Kòrsou. Esaki despues ku e promé konferensia a tuma lugá na mei 2023 na Aruba. El a katalogá e promé konferensia sumamente eksitoso ku partisipashon di diferente pais den region. E ta interesante mirando cu na mei na Aruba Jetten a informa Noticiacla cu e interes pa asuntonan di Clima ta casi nulo, pasobra tin problemanan mas importante cu esey pa atende. Asina mes, ta sigui tene e conferencianan.
Na Hulanda partidonan kier keda cla cu formacion di gobierno mitar di mei
DEN HAAG – Negosacionan pa forma gobierno nobo na Hulanda ta continua awe. E lidernan di e 4 partido ta hunto prome biaha cerca e informado. E intencion ta pa logra un acuerdo pa mitar di luna di mei di e aña aki ainda. Pero na final di e combersacion, Geert Wilders di PVV no por a sigura esaki ainda. Partidonan ta hopi positivo pa e progreso, pero ainda no por bisa si ta logra e meta menciona. Algun medio ta bisa cu e combersacionan ta bayendo hopi lento, pero e partidonan ta desmenti esey. E parti financiero ta e parti mas dificil pa atende. Na November di aña pasa tabatin eleccion y a cuminsa negosha. Ya ta bayendo pa 5 luna di formacion.
Inicio programa di investigacion cientifico internacional di pasado di sclabitud
ORANESTAD - E pasado di sklabitut kolonial di Hulanda i su impakto a forma diferente pais rònt mundu profundamente. Tòg e konosementu ku ta disponibel tokante e pasado di sklabitut kompartí akí ta skirbí partikularmente for di perspektiva kolonial. Pa enrikesé nos perspektiva, minister Dijkgraaf (Enseñansa, Kultura i Siensia) ta inisiá un koperashon global di sientífikonan riba e tópiko akí awe na Aruba. Esei el a anunsiá awe durante un mishon di konosementu den Karibe.
Follow NoticiaCla
