Studiantenan Scol Basico Kudawecha contento cu juffrouw Croes a bolbe

ORANJESTAD – Manera cu NoticiaCla.com a raporta ayera, e maestra cu inicialmente a haya un carta di suspension pa motibo di su comportacion, a bolbe su scol ayera mainta. Ta trata di juffrouw Suhail “Suki” Croes, rond di ken tin un investigacion andando ainda pa averigua kico exactamente a pasa, cu a conduci na un keho di parti di un mayor den su contra. E carta di suspension a wordo wanta, cu a pone cu ora cu Croes su periodo di ‘AO’ a termina ayera, e por a bolbe su klas sin problema.

MAESTRONAN NA PALABRA Tabata e studiantenan y nan mayornan cu a duna prensa palabra ayera y no e maestra mes, manera a kere inicialmente. E momento tabata mas bien pa e mayornan yama e maestra un bon bini dialuna despues di scol, y a combersa cu prensa. Studiantenan y nan mayornan a duna di conoce cu nan ta hopi contento cu e maestra tey bek y nan ta hopi contento tambe cu e maestra a sigui bringa su caso, pasobra loke a pasa cun'e ta hopi inhusto, segun e mayornan y e colega maestranan

SOSTEN AMPLIO

Tabata bisto cu e maestra en cuestion a haya hopi sosten di e studiantenan, mayornan, colega docente, y SIMAR. Awor cu su caso a keda entrega na corte y tur cos ta den man di hues y abogadonan, e maestra por bai traha bek y dedica su mes completamente na su studiantenan.