- Departamento di Progreso Laboral (DPL) cu campaña pa entrega Formulario AMR 2023 den luna di Juni 2023
- Directie Financiën ta informa di e condicionan ora di trata cu cobransa pa instancianan di Gobierno
- Foyeto Abo ta bay studia dentro di poco na Hulanda – con pa registra den BRP
- DUCAPRO a presenta un plan pa promove e industria creativo y proteha e artistanan
- E prome barco di fruta y berdura di Venezuela ta yega Aruba dialuna awor
TUI na Hulanda: Mercado di Merca ta pone presion riba disponbilidad di camber na Aruba
AMSTERDAM - E forsa di e mercado di Estados Unidos, mester bisa cu ta pone presion riba e disponibilidad di camber na cierto tarifa pa mercadonan Europeo y Latino Americano. No obstante esaki A.T.A., AAA y diferente hotelnan ta sigui pusha y ta realisa e importancia di tin un portfolio di mercadonan diversifica pa Aruba. Esaki a keda estableci durante un reunion cu ATA y AAA (Aeropuerto di Aruba) tabatin recientemente cu TUI na Hulanda.
Durante un biahe pa Europa, A.T.A. y AAA como ekipo a reuni cu miembronan di ekipo di TUI na Hulanda.
Pa e reunion tawata presente di TUI: Rob Oostendorp- Product Director Sun & Beach Long Haul, Manfred Lahey- Manager Sun and Beach, Frank Broersen- Group Account Manager, Tourist Boards & Key Partnerships y Jantine Bijl- Account Implementation Manager Tourist Boards.
Di e ekipo di Aruba tawata presente Ronella Croes- C.E.O. di A.T.A., Sanju Luidens-Daryanani- C.M.O. di A.T.A., Tirso Tromp- Area Director Europa A.T.A.,Jaap Ellis- Sales and Marketing Manager Europe A.T.A. y Jo-Anne Meaux-Arends- Aviation Business Development Executive di AAA.
Mescos cu algun siman pasa cu a reuni cu KLM, durante e reunion cu TUI a para keto na un 2022 record pa e mercado Hulandes (+8% compara cu 2019) y un bon aña pa e mercado di Europa. Pa e prome dos lunanan di 2023, e mercado Europeo a bay dilanti cu 7.5% compara cu 2022.
Pa 2023, Hulanda ta keda e mercado mas grandi pa Aruba for di Europa, e strategia di diversificacion ta continua si entre otro pa medio di introduccion di vuelonan di British Airways di Inglaterra y di Ving di Suecia.
Durante e reunion a discuti diferente aspecto di e relacion cu TUI y entre otro a discuti e fenomeno ariba menciona como tambe vuelonan cu por spera di parti di TUI November en adelante y pa 2024. Esaki ta mustra positivo. TUI ta bula 3 biaha pa siman y TUI NL ta un di e tour operadornan di mas grandi pa Aruba den e mercado Hulandes y ta vende mayoria pakete pa Aruba. Aruba ta haci diferente promocion cu nan cu ta stimula e demanda pa e destino. TUI a confirma cu e demanda pa Aruba ta halto y ta midi esaki a base di campañanan di Aruba cu ta lansa y e reaccion cu ta ricibi. TUI a reconfirma nan compromiso pa nos destino como un socio di ya basta aña pa Aruba. A.T.A. y AAA tambe a confirma continuacion di trabou den ekipo pa asina sigui desaroya e mercado debidamente.
Delegacion di Aruba ta na Hulanda caba pa Reunion Interparlamentario di Reino (IPKO)
DEN HAAG – Manera cu Noticiacla a raporta caba, di diahuebs awor, 1 di juni pa dialuna 5 di juni 2023, Reunion Interparlamentario di Reino (IPKO) ta tuma laga na Den Haag. Durante IPKO, e delegacionnan di Aruba, Curaçao y Sint Maarten y Hulanda ta reuni pa debati riba tema cu ta afecta e paisnan den Reino. E temanan di e IPKO aki ta cambio climatico y adaptacion na esaki, educacion, e proximo Conferencia di Reino, seguridad di data den Reino y superacion y procesamento di colonialismo y pasado di esclabitud.
Hulanda preparando pa comienso di reunionan di IPKO na Den Haag e siman aki
DEN HAAG – Hulanda ta preparando pa ricibi Parlamentarionan di Aruba, Corsou y St Maarten e siman aki pa reunionan Interparlamentario di Reino Hulandes, conoci como IPKO. E reunionan ta tuma lugar di diahuebs 1 di juni 2023 te cu dialuna 5 di juni 2023. E reunionan lo ta presidi e biaha aki pa presidente di comision fiho di Relacionan di Reino di Tweede Kamer, esta Mariëlle Paul (VVD), riba temanan comun cu ta toca e paisnan mnciona. Temanan den e reunion aki ta entre otro cambio di clima, enseñansa, e conferencia pendiente di Reino, seguridad di data dentro di Reino y e proceso di kolonialismo y pasado di sclavitud. NOTA: E potret ta di e ultimo reunion di IPKO cu a tuma lugar na Corsou na februari di e aña aki.
Video: Hulanda ta insisti riba recorte completo di 60 miyon y ta warda si wak Aruba lo cumpli
DEN HAAG – Aruba tin cu cumpli cu e recorte di 60 miyon florin riba gasto di salud pa 2023 y mas despues. Diabierna (awe mainta) e secretario di estado Hulandes Alexandra van Huffelen a bolbe confirma esaki den un contesta na Noticiacla. E mandatario no tabata cla si pa informa kico e consecuencia ta si Aruba no cumpli fin di aña. E mandatario a splica esey den e entrevisa cortico cu e portal awe mainta. Ademas, e mandatario a toca e tema di RAFT (manera relata den un articulo anterior riba e portal) unda cu ainda ta wardando un reaccion di gobierno pakico Aruba no ta di acuerdo cu e contenido di e RAFT.
Van Huffelen: Hulanda no sa ainda pakico Aruba ta contra e concepto di RAFT
DEN HAAG – Ta mustra cu tin un problema di comunicacion entre Aruba y Hulanda pa loke ta e tema di ley di reino di supervision financiero, conoci como RAFT. Dos luna premier di Aruba a bisa cu Hulanda ta na mesa cu Aruba pa negosha riba e tema. Y ta conoci cu Aruba tin problema cu e ley. Sinembargo awe diabierna mainta, a resulta cu Aruba ainda no a informa Hulanda kico e problema ta. “Gobierno di Aruba mester informa nos riba esey ainda” secretario di estado Hulandes Alexandra van Huffelen a bisa Noticiacla diabierna mainta den un entrevista cortico cu e mandatario. Pues mientras cu ta negoshando, toch ainda Hulanda no sa kico e problema pa cual Aruba no kier acepta e ley aki, ta. E ley ta condiciona na refinanciamento di e debe di Covid cu Aruba mester paga Hulanda bek e aña aki y ta algo cu Aruba a admiti dos luna pasa tambe. “Nos a palabra anteriormente cu nos ta bay traha un ley di Reino pa supervision financiero, y e reaccion di Aruba no a wordo manda pa nos (ainda)” van Huffelen a bisa. “Mientrastanto nos a informa nan tambe cu nos no solamente ta haya cu e ley mester bin, pero cu e ley ta condiciona na palabracion riba refinanciamento di e sosten di likidez” van Huffelen a bisa. Lamentablemente, Aruba segun e mandatario, on a informa Hulanda nada.“Pero riba esey, Aruba ainda tin cu informa nos ariba” e mandatario a finalisa bisando.
CAFt: Aruba ta rekeri reforma y esfuerso firme pa cumpli miho riba corto plazo
DEN HAAG – Aruba ta rekeri reforma y esfuerso firme pa mehora cumplimento fiscal riba corto plazo. Asina e colegio di supervision financiero pa Aruba CAFt a bisa secretario di estado Hulandes Alexandra van Huffelen durante nan bishita e siman aki na Hulanda. Di 22 pa 24 di mei 2023 e Colegionan di supervision financiero a haci un bishita di trabou na Hulanda. Aya nan a reuni cu Secretario di Estado di Asuntonan Interno i Relacion den Reino, Secretario di Estado di Finansa, e miembronan di Eerste y Tweede Kamer, e Ministernan Plenipotenciario, Controlaria General (Algemene Rekenkamer) y Conseho di Estado (Raad van State). Durante e combersacionnan a papia tocante un trayectoria plurianual pa logra un finansa publico sostenibel y e prioridadnan principal relaciona cu esaki pa e paisnan y entidadnan publico den Caribe.
Minister Hulandes Franc Weerwind di Proteccion Hurdico ta bishita Aruba otro siman
DEN HAAG - Minister Franc Weerwind di Protekshon Hurídiko ta hasi Boneiru, Aruba i Kòrsou un bishita di trabou di 21 pa 27 di mei. E bishita ta prinsipalmente den kuadro di sera konosí i den su ròl komo e persona responsabel pa diferente parti di sistema riba tereno di Hustisia i Siguridat. Tambe e ta hiba kombersashon tokante e pasado di sklabitut.
Follow NoticiaCla
