Señal pa parlamento cu Aruba lo haya un AMvRB of KB, ta cla

ORANJESTAD – No ta cuestion si Aruba lo haya un Koninklijk Besluit (KB) of un Algemeen Maatregel van Rijksbestuur (AMvRB) of no, sino ki ora y mas importante ainda, pakico. Esaki ta e pensamento cu ta biba den parlamentarionan di Aruba e dianan aki. NoticiaCla.com for di su fuentenan fidedigno, a haya confirmacion cu diabierna awor tin e proximo Conseho di Minister di Reino, y unda cu tin un concepto di un Algemeen Maatregel van Rijksbestuur riba mesa, cla pa entrega na Aruba. Esaki, si gobierno di Hulanda no cai prome cu esey. E gabinete hulandes ta tambaleando y tin chens chikito cu e por cay. Pero si esey no sosode, lo tin e reunion menciona, y cu e consecuencia menciona. NoticiaCla.com a haya reaccion di tur e tres lidernan di fraccion riba e mesun tema ayera. Y e pregunta pa nan, tabata kico nan pensamento ta riba e posibilidadnan aki. Y a resulta cu no tin diferencia di opinion cu si Aruba ta haya un maatregel, sino mas bien e diferencia ta, e motibo pa cual Aruba por haya uno.

RENE HERDE (AVP)

Ariba cifra, e presupuesto no por tin discusion segun lider di fraccion di e partido berde, Rene Herde a bisa. “A base di esey, no por bin ningun KB (Koninklijk Besluit). Loke tin, ta for di aña pasa, cu nan (Hulanda ) kier impone un CFT (College Financieel Toezicht). No for di esey, sino for di 2010. Herde ta referi na e momento cu Hulanda kier a hinca Aruba den e mesun Rijkswet cu Corsou y St Maarten pa pone CFT controla. “Aruba a protesta e tempo ey”. Herde ta admiti si, di a tende tambe cu Aruba tin un of otro medida na caminda. “Si, nos tambe ta tende nan (e grito pa un Maatregel of KB). Pero e unico motibo pa nan bin of cu un algemene maatregel van rijksbestuur of un KB, ta pa impone CFT. No otro motibo. No ariba e cifranan, no ariba e presupuesto. Esey ta masha cla. Si nan kier bin cune, ta pasobra nan kier impone y henter Reino fit den e mesun eenheid worst” Herde a sigui bisa. Kico lo pasa despues, Herde no por a bisa. ‘Laga e sosode prome” Herde a finalisa bisando.

EVELYN WEVER CROES (MEP)

Segun Wever Croes, awor nos ta mas serca di conclui cu si, nos ta bay haya algo. E confrontacion ta bisto segun e lider di e partido geel. “E ta hopi mas pio cu aña pasa, y aña pasa mes esey a duna nos un KB. Kier men cu algo lo sali di esaki. Kico e ta, nos no sa pero e ta obvio cu e ta bin di e mal maneho di gobierno” Wever ta bisa. E pregunta crucial sinembargo segun Wever Croes, no ta kico ta bin, esta KB of Maatregel, of pakico e ta bin, pero kico ta mas bien e consecuencia unabes cu nos haya e KB of maatregel. “Gobierno ta wordo man mara? Gobernador ta wordo instrui? Parlamento ta wordo man mara?. Esey tin nos preocupa” e lider di partido MEP a comparti cu NoticiaCla.com. Loke tambe Croes a bisa ta cu ningun di e gobernantenan lo por sali indigna si esaki sosode, pasobra ‘nan tabata sa masha bon kico ta bay pasa’.

ANDIN BIKKER (DR)

Lider di Fraccion Democracia Real Andin Bikker ta wak e cosnan poco diferente. Segun Bikker, Reino Hulandes no tin un papel pa hunga aworaki tanten cu parlamento no caba delibera riba e presupuesto. Como tal segun lider di Democracia Real Andin Bikker, nan no por mete. Ta ora cu e presupuesto wordo aproba y bay den ambito di Reino, e pregunta ta bin si tin un AMvRB. “Semper yen di cos por.” Bikker ta bisa , indicando cu cosnan semper por pasa toch. Di otro banda e ta confirma tambe cu otro señalnan ta mustra cu cosnan por pasa.