Parlamentarionan dividi riba presentacion di minister riba CFT

ORANJESTAD – Preguntanan di parlamentarionan awe merdia durante e bijeenkomst riba carta di College Financieel Toezicht (CFT) tabata basta. Gran parti di nan, tabata pa haya ‘claridad’ riba varios asunto circulando den aire. For di ‘kico e carta di CFT kier men pa Aruba’, te na ‘si nos no cumpli cu CFT nos ta haya KB atrobe’, y ‘duna mas claridad riba kico ta spera nos’. Na tur, parlamentarionan a tene e mandatario di finanza Angel Bermudez basta ocupa. Y na final, mayoria di nan, a mustra di ta satisfecho aunke no completamente cla riba e relacion entre CFT y gobierno.

REACCION ANDIN BIKKER

Lider di partido Democracia Real , Andin Bikker a mustra cu ta remarcable cu College Financieel Toezicht (CFT) ta manda un carta pa gobierno ‘ongevraagd’, y cu esaki tin cu kita tur duda cu CFT ta di acuerdo cu presupuesto 2015, y cu e ta den liña cu loke CFT a conseha. “Den mi concepto e ongevraagd advies a bin pa clarifica cu CFT ta para riba su punto di 29 di december” Bikker a sigui bisa NoticiaCla.com. Bikker ta mustra tambe cu ta dificil pa saca un conclusion completo mirando cu e nota di cambio no a wordo presenta na parlamento pues tin cu mira esaki ainda. Segun Bikker, e pregunta den comunidad ta keda, kico e destino di presupuesto 2015 lo ta, mirando cu tanto Raad van Advies como CFT ta duna comentario negativo riba e presupuesto. “Nos tin suficiente espacio den e proximo simannan pa evalua kico ta e nota di cambio y a base di esey, mira con nos ta bay trata cu e presupuesto”.

REACCION RENE HERDE

Den caso di lider di fraccion di AVP Rene Herde, e ta mustra cu e la haya aclaracion parcial di loke minister a bisa pa loke ta e normanan financiero y e begrotings kamer. Segun Herde, si bo mira e meerjaren raming y e balanced budget cu CFT y RvA y gobierno ta uza, e ta den e presupuesto y bou di e plafond di 1.350 miyon florin segun Herde. “Pami esey ta sumamente importante” Herde a sigura NoticiaCla.com. E otro preguntanan cu Herde tabata kier sa su contesta, ta kico ta pasa despues cu e balanced budget wordo logra. Herde ta considera cu en general minister Bermudez a contesta parlamento riba e carta (di CFT) corectamente. Mes momento e no a sconde su desaprobacion cu e tin cu CFT. “CFT tin un estilo di traha cu mi no gusta. Los di nan pensamento cu mi no ta di acuerdo cune” Herde a sigui bisa. Herde tabatin un problema tambe cu e hecho cu despues cu CFT a caba duna nan conseho, a mande pa prensa. “Mi obhecion pa cu CFT, e miho prueba ta Corsou” Herde ta bisa. Aki e ta mustra con e comision di evaluacion presidi pa Ron Gomez Caseres a mustra cu CFT no a funciona den 5 aña na Corsou.

REACCION EVELYN WEVER CROES

Lider di fraccion di MEP Evelyn Wever Croes ta considera cu minister Bermudez a perde un oportunidad pa trece poco trankilidad. “Mi ta kere cu loke nos a scucha awe ta cu e gobierno akinan no tin ningun intencion pa evita un confrontacion cu Hulanda”. Segun Wever, nan ta bagatelisa e carta di CFT, como un carta di recordatorio. Aworaki e ta mas preocupa cu e confrontacion ta eminente. “ E gobierno aki no tin ningun vision, idea of plan pa evita esaki”. Tabatin varios pregunta cu no a haya contesta, y e contesta tabata cu e minister no por duna contesta riba cosnan cu e no tin contesta ariba. Loke tampoco no a haya contesta tabata si minister a contesta e carta ‘no pidi’, pa set e cosnan recht. Pero riba esaki tampoco no a haya contesta. “Y asina tin varios cos cu no a haya contesta” Wever Croes a sigui bisa.