Bermudez : Carta CFT tabata sorpresa, imponente y ambivalente

ORANJESTAD – Completamente sorprendi minister di finanza Angel Bermudez tabata cu e ultimo carta cu e la ricibi di College Financieel Toezicht (CFT) recientemente. Asina e mandatario a conta parlamento awe merdia durante e bijeenkomst cu parlamento a organisa. E meta tabata pa tende reaccion di e mandatario riba e carta cu e la haya dia 10 di april ultimo. Fuera di sorprendi, e mandatario a describi e tono di e carta como ‘imponente, A considera e contenido como ambivalente, pero mas cu tur, a haya e carta mas bien un recordatorio di e conseho di december ultimo’. Usando e dicho :” Ieder vogel fluit zoals hij gebekt is” (tur hende ta bisa y haci manera cu ta cumbini’e), Bermudez a mustra cu e no ta compronde e motibo di CFT su carta. (lesa e carta di CFT di dia 10 di april aki)

SORPRESA

Pa cuminsa, loke a hala atencion ta e hecho cu e carta a bin di sorpresa, pues 'ongevraagd'. Esei ta mustra cu e no tabata algo palabra y cu esey ta manda un mensahe cla cu CFT no a keda contento cu e loke nan a mira y tende prome, y tabata kier un 'follow up'. Mas bien un 'reminder' di loke CFT kier mira realisa ainda, y pa gobierno 'tene cuenta cune' prome cu nan trata e presupuesto 2015. 

CONTENIDO

Specialmente mirando cu segun e mandatario, e carta no tabatin nada nobo aden. Ademas e la haya e manera con CFT a formula cierto cosnan cu nan tabata kier, como ambivalente (contradictorio). Entre nan e hecho cu nan kier pa gobierno raporta den mei proximo caba. Esaki siendo cu a papia riba esaki caba y a palabra cierto cosnan. “Pero no ta algo cu a wordo cumbini cu nan”. Tambe segun Bermudez, ningun momento a wordo palabra cu nan pa un asina yama nulmeting.

REFORMA FISCAL

Otro fayo cu Bermudez a trece dilanti di CFT, ta cu e reforma fiscal lo ta ‘un belasting besparing’. “Esaki niun momento ta e indicacion of tabata e parti di e recomendacionnan cu comision Vermeend a haci” Bermudez a bisa, ilustrando otro parti ambivalente di e carta. Loke e reforma ta logra, ta modernisacion, y mas importante, simplificacion di henter e sistema fiscal.

MEDIDA INCUMPLI

Pregunta di parlamentarionan tabata basta, y hopi dirigi. Entre nan cu si berdad ta considera e presupuesto 2015 como un ‘copy paste’ di 2014. Algo cu Bermudez ta haya straño, mirando e cambio grandi den deficit, y e introduccion di e 24 medidanan.

E ‘reclamo’ di CFT cu apenas 14 di e 24 medidanan ta completa, tambe tabatin splicacion. Gran parti di e resto ta den proceso (di wordo cumpli), y algun di nan no ta conta pa 2015 sino pa 2016. “Pero tur e medidanan (pa 2015) lo wordo introduci den 2015” Bermudez a purba sigura parlamento. Ademas den e toelichting, ta duna splicacion amplio riba e avance di e medidanan aki.

KB OF NO KB

Un pregunta cu ta bin dilanti hopi ta si gobierno ta spera un asina ‘KB’(Koninklijk Besluit) manera cu Aruba a haya aña pasa, si no cumpli segun ‘gana’ di CFT. Aki e mandatario den forma di cherche, a indica cu e unico KB cu e conoce cu ta bin ta e ‘Koninklijk Bezoek’, esta refiriendo na e bishita real proximamente di Rey Willem Alexander y Reina Maxima na Aruba. Pa loke ta e amenaza di un Algemene Maatregel van Rijksbestuur (AMvRB), Bermudez a indica cu for di aña pasa Hulanda ta menasa cu esaki y ‘esey no a cambia’.

NADA CONTRA CFT

Na final, Bermudez a purba sigura parlamento cu e ‘no tin nada personal contra CFT, y cu no tin problema pa incorpora nan medidanan. Solamente cu nan mester ta cuadra cu e situacion. Entre otro, repasando cada un di e 4 puntonan menciona segun e carta di CFT di dia 10 di april, e unico cu e no por mira introduci, ta e asina yama ‘solidariteits belasting’ pasobra e comunidad lo no por wanta esaki awor. Loke cu visiblemente Bermudez no tabata contento cune, ta e forma 'con CFT a parti e carta cu prensa despues', siendo cu e carta tabata riba e website di e compania.