Reparticion di diputado pa gobierno di Bonaire ta conoci

KRALENDIJK – Tur cos ta indica cu pa diamars atardi, Bonaire lo huramenta su tres diputadonan nobo cu lo guia e proximo gobierno di e isla di flamingo. Loke cu NoticiaCla.com por a confirma ta cu Partido Demokratico Boneriano  (PDB) ta haya 2 diputado y partido Union Patriotico Boneriano (UPB)  ta haya uno.

REPARTICION

E candidatonan di partido democratico ta Clark Abraham cu ta haya cartera di Bedrijfsvoering & Ondersteuning, y Benito Dirksz lo haya cartera di Samenleving & Zorg. Pa partido Union Patriotico Boneriano, James Kroon lo haya e cartera di Ruimte & Ontwikkeling. E intencion pues ta pa e diputadonan menciona, huramenta diamars anochi.  Foto cortesia Micheal Pieters

Manera cu NoticiaCla.com a raporta diabierna den forma di primicia, e noticia tabata confirma cu Bonaire tabata cla pa forma su gobierno nobo pa e proximo 4 añanan. Manera cu a raporta un dia anterior, e dos partidonan UPB y PDB a firma un acuerdo di combenio di 4 pagina, titula PATIA, como simbolo di union, usando e colornan di e patia, esta e berde (UPB) y cora (PDB). Den e convenio ta repasa e areanan di maneho, y e puntonan di e acuerdo di gobernacion. 

PROGRAMA 

Pa loke ta e areanan principal di maneho, tin asuntonan gubernamental, formacion, enseñansa i desaroyo personal, maneho social, bienestar i cuido, desaroyo economico i recurso natural y asuntonan estatal i relacion cu reino i exterior.