Na Corsou un ex agente polisial a keda asesina den fin di siman

WILLEMSTAD- Diadomingo 19 di mart den oranan di mardugá, Kòrsou ta konosé su di dos kaso di asesinato p‘e aña aki. Ta trata di un èks agente polisial yu’i Kòrsou ku tabata traha den Kuerpo Polisial di St. Maarten (KPSM). Den kareda di 03.18’or di mardugá, Sentral di Polis a risibí informashon di kaso di tiramentu ku a tuma lugá na Plasa Hariri/Rotònde Palu Blanku. Un unidat polisial a keda dirigí na e sitio i na nan yegada a enkontrá un hòmber drumi abou na suela, pafó di su outo, i no ta duna señal di bida.

For di un investigashon preliminar a sali na kla ku pa motibu te ainda deskonosí lo mester a tuma lugá un tiroteo kaminda e víktima a wòrdu alkansá na parti ariba di su kurpa. Ambulans ku a yega rápido na e sitio no por a hasi nada mas pa e víktima. Dòkter di polis a yega na e sitio i a konstatá morto di e hòmber Niven Clemens Patrick Van Thijs nasé Kòrsou dia 16 ougùstùs 2000.

Na e sitio polis a haña i konfiská e siguiente artíkulonan ku ta di importansia pa e investigashon: un vehíkulo ku e víktima tabata okupá; un arma di kandela i algun kashi di bala (huls). Remarkabel ta ku e arma di kandela lo ta unu ku ántes kuerpo polisial tabata usa.

Informashon ku nos ta dispone di dje ta ku e hóben èks agente polisial lo tabata den área di Saliña i lo tabatin interkambio di palabra ku algun hende. Esaki a eskala i lo a start un persekushon tras di e víktima. Na altura di e rotònde a blòkia e outo dje èks agente i a los bala riba dje. Segun nos por a mira ku el a haña bala na kabes. Tambe e víktima lo mester a los bala riba un dje malechornan, kende a bai CMC den outo partikular heridá.

Di parti di Kuerpo Polisial di St. Maarten ta lamentá morto di Van Thijs. E Hefe di KPSM a bisa ku un tristesa nan a risibí e informashon di asesinato di èks kolega di KPSM, kende a fayesé na Kòrsou dor di un tiroteo. Tambe e hefe di kuerpo ta indiká ku algun luna atras, Van Thijs a tuma retiro for di kuerpo na St. Maarten pa e regresá Kòrsou, su isla natal. E víktima su tata tambe ta un agente polisial den KPC. Finalmente polis ta bisa ku investigashon den e kaso aki ta kontinuá. Pas na su alma. NOTA: Texto ta scirbi den Papiamento fonetico di Corsou.