Sydow: Zöetry cu solucion pa problema di mosquito na mangrove Isla de Oro

ORANJESTAD – Ora cu e construccion di e ‘boutique hotel’ Zoetry@ Isla di Oro cuminsa mas laat e aña aki, e desaroyado nan lo tin algun reto pa tene cuenta cune. E reto mas grandi? Soluciona e problema di muskita na e mangrove, y no causa destruccion di un area practicamente ‘virgen’ na construccion. Pa no lubida, atrae suficiente turista cu por paga entre $700 pa $1500 dollar pa anochi pa hospeda den e hotel. Pero segun e desaroyado di e proyecto Franz Sydow a splica NoticiaCla.com, tur e puntonan aki ta cubri den e proyecto ambicioso. Sydow a duna NoticiaCla.com acceso in usual den su proyecto miyonario, (balora na 40 miyon dollar), pa mustra con tur e puntonan cu ta wordo cuestiona, a/y lo keda resolvi.

BUROCRACIA

E prome obstaculo, ta e burocracia gubernamental cu tin e proyecto ‘on hold’. “Asina cu nos haya e permisonan di erfpacht necesario, nos por cuminsa. Si esaki sosode ainda pa e di tres cuartal di aña aki, nos por habri e hotel na 2018” Sydow a sigura NoticiaCla.com. Tur cos tabata cla segun e desaroyado pa nan haya e permisonan necesario pa mei di e aña aki. Pero e desaroyado ta compronde cu cosnan no tur ora ta mes facil. “Financiamento, plannan, tur ta wardando pa e permisonan pa por cuminsa construccion e aña aki mes” un Sydow optimista a sigura NoticiaCla.com.

DESTRUCCION AREA

E precupacion mas grandi di comunidad ora cu a tende di e proyecto, ta e destruccion cu por tuma lugar teniendo na cuenta cu e zona ta uno di naturalesa impecable, y unda cu mangrove ta e palabra clave. Y asociando nan mes cu un instancia oficial certifica di calidad, nan ta garantisa cu tur construccion ta wordo ‘vigila’ hopi di serca pa ‘sigura’ cu nada di naturalesa ta wordo ‘destrui’. Haya un certificacion asina mes ta dificil. Y si tin cualkier duda, e instancia aki lo garantisa cu e compania ta tene su mes na e standard halto aki.

MAL TEMPO

Otro obstaculo, ta tempo. Situa riba un isla cu ta ‘den’ e zona di horcan, no ta un problema segun Sydow. De hecho, e ta considera e area como un di esunnan mas ‘safe’ di e isla. Ubica den e parti zuidoost, e ta proteha grandemente, tambe pa e mangroves. E ta conciente toch, cu nunca nan lo ta 100% protegi. De hecho, a percura pa (riba conseho di un estudio rigoroso haci) traha e bungalownan riba awa, riba un haltura di entre un pa dos meter. Asina e ta evita posibel destruccion si tin mal tempo, ola halto etc. “Nos a bay atras 20 pa 30 aña y revisa tur tormenta cu a pasa Aruba, y wak ki efecto esaki tabatin riba e isla. Basa riba e resultado, nos a diseña e proyecto bunita aki” Sydow ta sigui bisa.

MANGROVES

Pero e reto mas grandi, ta keda e mangroves. No asina tanto pa e destruccion di esaki, sino e problema di mosquito. Ta conoci cu ora cu tin mangrove, tin e problema di mosquito. Pero segun Sydow, nan a haya e solucion, y cu tratamento por garantisa cu por lo menos 80% di mosquitos no ta molester pa e huespednan. E problema actual, segun Sydow, ta cu na hopi mangroves e awa den cual e mangrove ta biba, ta para. Y aki e ta crea un problema unda cu mosquito ta broei. Door di crea canalnan cu ta pone cu e awa ta core, e ta elimina gran parti di e problema di mosquito. Y esey tambe ta algo cu e desaroyado nan ta bay haci: crea canalnan pa e fluho di awa continua y evita cu e ta keda para.

CLIENTE AFLUENTE

E parti cu sigur ta un reto, ta pa genera suficiente turista interesa cu kier paga e suma di entre 700 pa 1500 dollar pa anochi den e hotel. E no ta e turista regular cu por afford paga e cantidad di placa pa un anochi. Segun Sydow, cu excepcion di clientenan di Ritz Carlton, Aruba no conoce e tipo di clientela aki ainda. Ta clientenan cu ta conoci di gasta e placa aki pa bay Bora Bora. Pero, mientras cu Sydow ta admiti cu Aruba no ta Bora Bora, e tin cosnan cu Bora Bora no tin y cu ta diferencia nos isla di un isla exotico manera Bora Bora. A haci investigacion rigoroso den e clientela di Zoetry tur rond mundo, y e loke cu Aruba lo ofrece, lo sigura cu nan lo haya e clientela aki cu sigur ta uno cu ta gasta y haya un experiencia unico.

LOCALIDAD ALEHA

E localidad aparte, distante, ta netamente loke e cliente aki gusta. Como tal e zona aleha di Isla de Oro, ta perfecto segun Sydow. Y despues di algun dia di ta aleha, e cliente mes lo busca caminda pa bay, pasobra e persona no por keda tanto dia isola asina. “Mi ta sigura cu e experiencia lo ta miho cu Bora Bora” Sydow ta sigura NoticiaCla.com.