Vandalismo na scolnan a continua den fin di siman

ORANJESTAD – No menos cu dos scol y un centro a bira victima di vandalismo den e ultimo siman aki na Aruba. Entre e scolnan, tin Pieterboer school cu no menos cu ayera, a bira victima di ladronnan di tubonan di koper. Fuera di e scol, Teresita Center na San Nicolas a haya bishita di malechornan cu a comete vandalismo door di kibra e machine di ijs y lag’e benta abou. Algun siman prome nan a kibra bentana eynan.

FILOMENA BASIS

Siman pasa tambe e scol cu tabata den noticia, Filomena basis tambe a perde nan tubonan di koper, ora cu ladronnan a horta esakinan. “Hopi erg e cosnan aki ta”, un maestra di e scol a sigui conta NoticiaCla.com. Mientrastanto NoticiaCla.com a compronde cu a duna orden siman pasa caba pa drecha e tubonan di koper mesora pa e scol por a haya awa atrobe. No ta conoci si e otro scolnan tambe tabatin e mesun ‘suerte’ di haya nan cosnan drecha mesora.