Juffrouw ‘Suki’ a bolbe awe na scol na Kudawecha

ORANJESTAD – Awe ta prome biaha, desde cu e la tende cu e la wordo suspendi, cu juffrouw ‘Suki’ Croes a bolbe su klas na Scol Basico Kudawecha. Relaciona cu esaki, a yama un conferencia di prensa pa awe merdia, pa asina splica kico a pasa. No ta descarta cu Croes mes lo duna un splicacion personalmente di loke a sosode cune. Lo ta prome biaha cu publicamente e lo haci esaki.

PROBLEMA SERIO

Manera ta conoci, e juffrouw aki a haye den problema serio ora cu un mayor di un di su alumnonan a keha su actuacion serca directiva di scol, cu finalmente a causa su suspension pa 5 dia, y un ‘overplaatsing’ pa un otro departamento. Tin varios version di loke a sosode, y pendiente e investigacion den e caso aki, a dicidi pa suspende e juffrouw. Esaki a causa un ola di reaccion di comunidad y tambe sindicato di maestro Simar.

PARLAMENTO

Intervencion di parlamento sinembargo, a pone cu a ‘hala’ e suspension aden, cu a pone cu Croes por a bolbe trabou atrobe awe. E carta di suspension, sinembargo ta ‘wanta’, pendiente e investigacion. Esaki ta nifica cu si dado caso resulta cu enberdad algo a bay robez, cu e carta por wordo ‘activa’, cu tur su consecuencia.