World Consumer Rights Day: nos tur ta consumidor

ORANJESTAD - Den cuadro di Dia Mundial di Derechonan di Consumidor ayera, 15 di maart 2023, Minister Geoffrey Wever den cooperacion cu Universidad di Aruba a duna un charla riba derecho di consumidor. Cu participacion di entre otro sector priva, Aruba Fair Trade Auhority, y Servicio na Defensa di Consumidor a intercambia punto di bista riba e rol di e consumidor den nos economia y con por traha hunto pa cada un di nos consumidor bira un consumidor critico y consciente.

Segun e mandatario, cada compra di un producto of servicio ta contribui pa pusha nos economia. Cada ciudadano ta un consumidor. Ora bo hasi bo compra den un supermercado of paga pa service bo airco na cas bo ta un consumidor. 

Ley existente, nos Burgerlijk wetboek of Codigo Civil, ta duna e proteccion necesario na e consumidor. Pero e consumidor no sa tur ora su derecho y tampoco ta wordo mustra riba esaki. Esaki ta un problema pa nos desaroyo pasobra mas un consumidor sa mas consciente y critico e ta bira ora di tuma su decision pa cumpra of no. Un decision cu tin su impacto positivo riba competencia entre negoshinan y innovacion.

Dia Mundial di Derechonan di Consumidor 15 di  maart ta un dia cu nos ta para keto y reflexiona riba nos derecho como consumidor. Segun Wever, riba e dia aki, ta importante pa realisa, acepta y actua cu como consumidor nos tin derecho pa exigi practicanan comercial hustu y transparente, haya informacion exacto tocante producto y servicio, y asina kies si ta cumpra of no.

Minister Wever a sigura di ta tumando pasonan concreto pa proteha y promove derecho di consumidornan. “Nos ta trahando riba ehecucion di ley regeling consumentenkrediet cu ta prohibo companianan cobra interes mucho halto ora di duna lening ora por ehempel ta cumpra wasmachine, teelfoon riba afbetaling”, segun minister Geoffrey Wever. “Ta nos compromiso tambe pa asegura cu empresanan ta wordo responsabilisa pa cualkier violacion di derecho di consumidornan, manera fortificacion di mecanismo di control y implementacion di castigo mas estricto pa practicanan engañoso” e mandatario a finalisa bisando.