Awe parlamento lo haya bista di gobierno su intencion cu CFT

ORANJESTAD – Awe tardi parlamento di Aruba ta tende comentario di minister di finanza Angel Bermudez, riba e carta recien di College Financieel Toezicht (CFT). E comentarionan ta basa riba nan observacion di e presupuesto 2015 y e supuesto cambionan haci. Den e carta aki, CFT (cu aña pasa tabata instrumental den tratamento di presupuesto 2014) un biaha mas ta mustra cu e presupuesto ainda no ta cumpli cu loke cu CFT a proponi. Algo cu lo por crea un problema proximamente pa gobierno di Aruba. Y parlamento kier tende kico gobierno tin pensa di haci cu e contenido di e carta.

CONSEHONAN CFT

E carta fecha 10 di april (lesa e carta aki) ta haci mencion di 4 conseho cu CFT kier pa gobierno di Aruba implementa. Y si e consehonan aki no wordo implementa, tin chens cu CFT atrobe por duna conseho negativo, cu por nifica un ripiticion di aña pasa. Un ripiticion den sentido cu atrobe gobernador no ta firma presupuesto, cu tur su consecuencia cu esaki por tin pa pais Aruba.

INSIGHT

Pesey, e comentario di Bermudez ta importante, ya cu e por duna luz riba kico por spera durante tratamento di e presupuesto mas laat den siman. Mirando e situacion di aña pasa, unda cu gobernador a nenga di firma e presupuesto 2014 inicialmente, kier percura pa esaki no sosode mas. Como tal kier sa ‘unda nan ta para’ pa cu CFT na e altura nan aki. Y a base di e comentario di Bermudez, na lo por haya un ‘insight’ di kico ta spera nan aki un par di tempo.

ESTABLECIMENTO NA ARUBA

E mandatario mientrastanto a sigura NoticiaCla.com cu ainda e no a haya ningun notificacion di CFT cu nan lo ta estableciendo nan mes na Aruba. Y te na e momentonan aki cu Aruba ta den negoshacion cu Hulanda riba e supervision financiero, esaki no a keda determina. “Ami no a mira ningun indicacion, y no tin ningun relacion cu nan tampoco” Bermudez a bisa, aunke cu e tin contacto cu nan si. Pues oficialmente CFT no a informa gobierno di nan intencion di establece nan mes na Aruba.

VAN PUTTEN

Bermudez a tuma nota tambe cu lo tin un ‘tal van Putten’ cu lo a wordo emplea pa CFT, pero no conoce e persona aki mas di acerca. Van Putten, segun CFT a wordo tuma recientemente y e intencion ta pa e ta encarga cu e.o. Aruba. De hecho, e la wordo poni como un di e personanan di contacto pa Aruba, riba e carta recien (lesa e carta aki) pa Bermudez, dia 10 di april ultimo. Pero Bermudez, aparte di a tuma nota den corant di su empleo recien, no conoce mas di acerca.