Hospital di Aruba y Corsou cu acuerdo pa wondenpoli

ORANJESTAD - Riba invitacion di SEHOS ( hospital di Corsou)  Y Ministerio di Salud di Corsou,  Sr Ezzard Cilié, director di cuido na Hospitaal, a bishita e instancia nan aki diabierna ultimo. Conclusion di e bishita aki a resulta finalmente den un acuerdo pa HOH facilita y yuda SEHOS desaroya su propio Wondenpoli na Corsou segun e concepto di wondenpoli arubano na Hospital como centro avansa di cuido di herida. SEHOS na varios ocasion a demostra su interes y necesidad pa desaroya un Centro asina aki. E acuerdo ta ensera training y educacion, intercambio di personal y facilita SEHOS cu experiencia di HOH pa desaroya e infrastructura medico pa maneho di herida, y acompaña pa un centro di herida di SEHOS. Cu esaki ambos instancia ta duna inicio na e forma di cooperacion den futuro entre Corsou y Aruba pa nan respectivo comunidad di patiënt. Un danki na Aruba Medical Supplies cu a facilita cu tur e contactonan necesario pa realisa e trabou. Mester menciona cu Corsou no ta e prome cu ta adapta e concepto Arubano aki, tin mas isla den pasado cu a adapta e concepto aki exitosamente. E sigiente actividad di Wondenpoli lo ta e “3rd Island Wound Care Symposium” dia 23 di October 2015 na Aruba y pronto nos lo publica mas informacion encuanto esaki pa promove e concepto y centro di cuido avansa di herida (wondenpoli) di Hospital.