Yiu di prome minister Wever y yiunan di politico Williams ta topa den corte otro siman

ORANJESTAD – Otro siman yiunan di dos politico contrincante ta confronta otro dilanti mesa berde. Ta trata aki di yiu di nada menos cu prome minister di Aruba Evelyn Wever Croes, esta K. Wever, y yiunan di politico Micheal Williams esta N. y C. Williams, y tambe pareha di otro yiu di prome minister esta e sospechoso Y. Torres-Mendez. Oficiallmente segun Ministerio Publico, ‘e sospechosonan ta wordo acusa di maltrato y di a comete violencia den lugar publico 14 november 2021’.    

E CASO

E caso aki particular ta data bek dos aña unda cu riba 14 di November 2021, tabatin un pelea den baño di un club nocturno na Palm Beach entre yiunan di e politiconan menciona. E pelea aki no a caba aki pero a sigui despues den un restaurant conoci eybanda mes. Aki e pelea a continua ora cu un di e sospechosonan a topa cu e otro den e restaurant comiendo. Aki tabatin un pelea, cu a inclui destruccion y maltrato entre e personanan y tambe un chef di e restaurant en cuestion. E chef despues a haya tratamento medico y a keda transporta pa hospital. 

TRATA E CASO TOCH

Tabatin hopi intento pa e caso no wordo trata publicamente mirando e embergadura di esaki ya cu ta trata di politiconan conoci y yega na un areglo pafo di corte, y despues a purba di trata esaki via un asina yama Tom zitting. Sinembargo noticiacla a compronde cu di parti di un banda di e sospechosonan Williams, a opta pa esaki wordo trata den un caso regular, ya cu nan ta insisti cu nan ta inocente. E caso awor ta riba agenda di Corte, pa tuma lugar otro siman diahuebs pa 8’or y mei di mainta.