Grupo di venezolano na Aruba a recorda y protesta

ORANJESTAD – Bao di canto di cancionan venezolano y nan himno, un grupo di entre 50 pa 60 venezolano residente na Aruba a reuni awe tardi laat riba Plaza Simon Bolivar cu dos meta specifico. Segun nan ‘representante’ sra Laura Luces a splica NoticiaCla.com, nan ta recorda awe e ‘inicio di independencia di e pais (19 di april 1810) , y 'protesta alavez cu 205 aña despues, e pais ta wordo goberna pa un gobierno di dictadura cubano’.

ELECCIONAN VENEZOLANO

E grupo aki segun sra Luces, ta parti di un grupo di entre 1000 pa 1500 venezolano residente na Aruba cu ta protesta e gobierno actual chavista cubano, y cu kier cos bay bek manera antes. “Nos ta sinti e nostalgia di nos tera” Luces a sigui bisa. E ta bibando 12 aña na Aruba y a monitoria e situacion electoral for di tempo ey. Y for di esey, a nota un patronchi positivo, aunke cu consulado di nan pais no ta aporta na esaki.

PROHIBI PA REGISTRA

Segun Luces, na inicio di su estadia 12 aña pasa, e eleccionnan presidencial tabata wordo gana pa e grupo chavista, di forma 60-40. Segun añanan ta pasa, esaki a bira 50-50, y ultimo nan a te hasta gana e eleccion di un forma abrumador. Esaki kier men cu entre e grupo di venezolano residencia na Aruba cu a vota, e gran mayoria a vota contra e presidente actual Nicolas Maduro. Pero segun Luces, riba e fecha ey, por lo menos 100 of mas venezolano no a wordo permiti pa registra riba e ‘registro electoral permanente’. “Ora cu bay pa registra bo mes na consulado venezolano riba e registro permanente, nan no ta permiti bo” Luces a sigui bisa. “Si nan a permiti e grupo aki di registra, e victoria tabata aun mas grandi” Luces a sigui bisa.

AUSENCIA

Pa loke ta e grupo cu a presenta awe tardi, a conta entre 50 pa 60 persona. Luces aunke contento, a spera mucho mas hende. “Mi no sa kico a pasa cu nan no a bin” e la sigui bisa.