21 scol y 9 edificio di Gobierno cu panel solar pa 3.8 di megawatt

ORANJESTAD – 21 di e 80 scolnan cu tin actualmente na Aruba ta cumpli cu e condicionnan necesario pa por haya panelnan solar riba nan dak E 20 scolnan hunto cu algun edificio di Gobierno lo por produci 3.8 megawatt di coriente sostenibel. Pa por a determina esaki, a haci un estudio cu a revela e resultado conoci.

COMISION Y ESTUDIO

ELMAR y WEB ta representa den e comision den persona di Elton Lampe. El a trece dilanti cu na momento cu a cuminsa cu e proyecto aki a pone como meta pa instala un sistema solar PVC di 100 KW. E motibo ta cu e grandura di un sistema asina ta permiti mas flexibilidad pa acomoda e energia solar den e grid di ELMAR. A cuminsa pa tuma un inventario di e areanan di daknan disponibel na scol, cu por carga e peso di e panelnan solar. “E ultimo aspecto aki a elimina un gran cantidad di dak, no debi na e calidad pero e tipo di daknan cu tin instala.” Despues a haci un evaluacion di e sistema di coriente manera cu e ta awor, pa mira si e por handle e poder di e coriente cu ta wordo manda pa e grid. Tambe a tene na cuenta e plannan di renobacion of construccion di scolnan cu tin pendiente. Na mesun momento a haci un evaluacion di edificionan di Gobierno. E resultado di e estudio tabata cu di e 80 scolnan, 21 ta den capacidad pa instalacion di panelnan solar y tambe 9 edificio di Gobierno ta bon candidato pa hunto produci 3.8 megawatt di coriente. Si tur scol tabata adecuado pa panel solar, e lo tabatin un potencial di 10 megawatt.