Landado Keeley Maduro ta gana oro pa Aruba na CONSANAT na Peru

LIMA - Un momento historico atrobe pa Aruba su landamento a sosode durante e tercer día di e Campeonato Sur Americano na Peru. E hobencita Keeley Maduro a gana medaya di Oro den 50m mariposa kibrando e record di CONSANAT cu tempo di 29.13. E tempo aki ta un Record Arubano Open y di categoria tambe. Pa Aruba esaki no ta e prome medaya di Oro pero nunca antes un landado di Aruba a kibra un record di Consanat. Keeley ta e landado mas lihe di Sur America den historia algo masha bunita mes pa e deporte di landamento na Aruba.

Pa e equipo di Aruba tabata tin mas medaya. E relevo mixto den categoria 13-14, Daniel Jacobs, Keeley, Brandon Cheong y Flory Kock a logra gana medaya di brons den 4 x 50 estilo liber. Mikel Schreuders cu otro record Arubano Open y di categoria den 50 liber awor ta e Arubano mas liher den awa. Cu e tempo 23.63 Mikel a gana medaya di Bronze. Mikel a landa e final di 50m pecho tambe y cu un record personal di 29.83 a keda na di 4 luga. Otro record Arubano Open y di categoria 15-17 a wordo landa pa Patrick Groters den 50 lomba, 28.32 na unda e la keda na di 8 luga. Den 1500m liber Patrick a keda na di 5 luga. Flory Kock a drenta final di 100 m liber y un biaha mas a keda net pafo di e medayanan na di 4 luga, masha cerca di kibra e 1 minuut, cu 1:00.18. Rebecca Maduro finalisando na di 7 luga den e final di 200 liber cu un record personal di 2:10.29. Daniel Jacobs a pasa pa final den 400m liber, landando 4:17.65, pa di 7 luga.