Medionan Hulandes a cuminsa duna atencion na seleccion di Hulanda den World Baseball Classic 2023

AMSTERDAM – Aunke no riba nan paginanan principal, manera lo ta custumber, varios medio Hulandes principal a duna cobertura awor si na e seleccion di Hulanda pa World Baseball Classic 2023. Manera ta conoci, diahuebs e seleccion Hulandes consistiendo primordialmente di hungadornan di Corsou y Aruba, a gana nan di dos wega sigui, e biaha aki contra Panama. Si un dia solamente 2 medio Hulandes a duna cobertura na e prome victoria (AD y Telegraaf), diahuebs practicamente tur e 4 pa 5 medionan principal a duna atencion na e victoria contra Panama. Mientras cu nan no a haci esaki riba nan pagina principal, mayoria a ubica esaki riba nan parti deportivo (unda cu e noticia mester ta berdad, pero ta conoci cu dependiendo e noticia, hasta esaki ta bay dilanti asina mes cu e ta algo deportivo). Un di e comentarionan pa e (falta) di atencion ta debi na e cultura deportivo Hulandes. Hulanda ta mas interesa den futbol, y otro tipo di deporte, cu si ta logra bin full dilanti ora di un victoria nacional. Loke futbol ta pa Hulanda, baseball ta pa Merca, y esey ta e motibo pa cual e atencion no ta manera cu nos lo a spera di ta. Hecho ta, cu Hulanda (cu su ekipo di yiu di Corsou y Rubiano) ta sacando cara internacionalmente.