Hulanda ta gana su di dos wega tambe di World Baseball Classic 2023!

TAICHUNG – Hulanda a gana su di dos wega sigui na e World Baseball Classic 2023 na Taipei diahuebs marduga (ora di Aruba) y esaki tabata contra Panama cu score di 3-1. Un dia prome, e mesun Panama a gana di Taipei cu e score di 12-5. E dos gran hungadornan di e partido aki tabata Xander Bogaerts y Jurickson Profar, ambos cu un homerun. Tabata den di 3 inning cu Bogaerts a dal un homerun den left field, haciendo e score 1-0. Den bom di 5 inning Jurickson Profar a dal su homerun den right field haciendo e wega 2-0. Panama ta bin bek den cabez di 6 inning cu 1 careda di Jose Ramos danki na e hit di Erasmo Caballero. E wega a bira 2-1. Den bom di 8 inning, Xander Bogaerts ta dal un doblete, y despues Didi Gregorius ta dal un toke di sacrificio, manda Bogaerts tercera. E siguiente careda ta drenta debi na un wild pitch, cu ta pone Xander Bogaerts score e careda number 3 pa e wega bira 3-1 finalmente. Na final Hulanda ta score 3 careda, dal 8 hit y tin 0 error. Panama ta score apenas 1 careda, dal 7 hit y comete 1 eror. E siguiente wega pa Hulanda ta diasabra mainta 7’or ora di Aruba, contra Taipei. Hulanda ta encabesa su grupo cu 1000 punto, sigui pa Panama cu 500. Potret cortesia Henk Seppen