Minister Hulandes mes ta confirma cu Aruba ta riba lista shinishi di paraiso fiscal

"ORANJESTAD – E siman aki, propio minister Hulandes di Finanzas Sigrid Kaag a confirma na Tweede Kamer cu Aruba ta riba e lista shinishi di Paraiso fiscal'. “ E paisnan riba e lista fiscal shinishi, a priminti pa dentro di un termino specifico cumpli cu e standard fiscal” e mandatario a raporta e siman aki na Tweede Kamer. “Si esey no logra, e ora e paisnan lo bay riba e lista preto fiscal (paraiso fiscal:red)” e mandatario Hulandes a sigui bisa. “Den cuadro di esaki, Aruba y Corsou a wordo poni riba e lista shihishi pasobra ambos pais a resulta di no ta cumpli completamente cu e norma pa intercambio automatico di informacion” Kaag a sigui bisa. “Tanto Aruba como Corsou a compromete riba nivel halto politico, cu pa mas tarda tres cuartal di 2024 nan lo cumpli cu e standard rekeri” e mandatario Hulandes a finalisa bisando riba e tema.   

MINISTER MADURO 

Ora cu Noticiacla a publica e noticia inicialmente di e lista shinishi, minister di finanza Xiomara Maduro a purba refuta e informacion mesora reaccion bisando e.o. cu “e siman aki a keda publica den algun media internacional cu Comision di Union Europeo a pone Aruba riba e lista di paraisonan di impuesto. Minister Maduro ta refuta e informacion incorecto aki y ta brinda e informacion corecto”. Esaki siendo cu e realidad ta cu Aruba ta riba e lista shinishi di Paraiso di impuesto. No a bisa ningun momento lista preto, manera e raportahe di noticiacla a informal una pasa.  Segun e mandatario “ Gobierno di Aruba, por medio di Departamento di Impuesto tin un relacion estrecho cu e seccion di impuesto di Comision di Union Europeo pa por cumpli cu tur e rekisitonan ora ta trata normanan internacional pa evita cu Aruba ta wordo categorisa como un pais complaciente pa contribuyentenan por evadi impuesto”. Esaki por ta e caso berdad, pero esey no ta kita afo, cu Aruba actualmente ta riba e lista shinishi, tal manera cu e portal aki a raporta inicialmente. Y awor cu e mandatario Hulandes a confirma, ta contradeci e raportahenan na cual e mandatario di Aruba a refuta, no tabata corecto. Por lesa e carta di e mandatario Hulandes AKI.