Caso di hincamento pa motibo di celos pa dama

ORANJESTAD - Diasabra algo pasa di 7'or di mainta, polis y ambulance a wordo manda cu hopi urgencia na un adres na Tanki leendert pa un caso serio di hincamento. Na yegada nan a topa cu dos homber Latino baña den sanger. Uno tabata tin un hinca na su pecho y tabata sangrando profusamente, mientras e otro tambe tabata sangrando hopi. E tabatin un corta grandi na su man tambe. Polis a bin compronde cu ta trata di un caso di celos cu a pone e dos hombernan aki bringa cu otro. Despues di a lucha cu otro, uno den afan pa defende su curpa, a haya corta na su man, mientras cu e la logra hinca e otro tambe . Dos ambulance a presenta na e sitio, y despues di a trata nan na e sitio, a transporta ambos homber pa hospital. Di nan dos, esun cu hinca na pecho ta grave. Aparentemente ta for di 4'or di marduga e problema a cuminsa. Tabatin hopi desordo cu zundramento y culpamento di otro, paso aparentemente e dama cu ta pareha di esun gravemente herida lo tabata tin un relacion amoroso cu e otro homber. Asina a start un problema cu a caba pues na hincamento cu cortamento. E cuchiu cu a wordo uza, a wordo haya dobla hinca bou di un auto. E cuchiu a keda confisca pa polis. Despues di e hincamento, e dama a bandona e sitio. Y ta casi dos ora despues cu e la bolbe, polis na e sitio a para e dama pa tuma su declaracion. Recherche y departamento tecnico di polis a bay na e sitio. E caso aki ta den man di recherche pa mas investigacion.