Cuerpo Policial Aruba a despedi di ex hefe interino districto San Nicolas

MACUARIMA -  Cuerpo Policial Aruba a despedi di ex hefe interino districto San Nicolas  Andy Young. E la drenta Cuerpo Policial Aruba dor di empuge di su mesun colega Sr. Honory Eights. Desde su entrada e la huramenta riba 31 december 1984. E ultimo klas formando parti di Antiyas Hulandes prome cu Aruba a drenta Status Aparte.  For di 1984 su carera policial a inicia y for di e momento aki ela traha na diferente departamento di polis. Su ultimo funcion tabata como hefe interino districto di San Nicolas. Ademas Sr.Young tabata responsabel pa e team di VIP y tambe ta forma parti di Commisie Korpsviering.

Alto comisario Arnhem a menciona cu ta un perdida cu Sr.Young ta bay cu pensioen pero alavez ta desea Young tur  cos bon, salud y cu e disfruta di e dianan liber su dilanti. 

Alto comisario Arnhem a gradici Sr.Young pa cu su lealtad na Cuerpo Policial Aruba como tambe su esfuerso y inspiracion na hopi coleganan. Arnhem a remarca cu nos mester honra e coleganan cu a duna añas di servicio pa cu Cuerpo Policial. Door di nan KPA tey awe riba pia. 

Riba e ultimo dia di su warda ela haya su Last Call dor di Central di Polis pa gradicie y tambe un aplauso fuerte di tur Polis y personal administrativo di San Nicolas pa su ultimo dia den presencia di su casa y yiunan.