AIV: Aruba y Corsou ta keda stacionan intermedio di cocaina di Sur America

ORANJESTAD – Ex tesorero di e  fundacion cu ta maneha placa di e partido politico POR, Jaqueline van Putten a keda sentencia na 120 ora di trabou comunitario y multa di 1.000 den e caso Diamanta, unda cu e la wordo haya cupabel di a malversa e suma menciona. Segun e huez, van Putten a malusa su funcion di tesorero pa enrikese su mes cu e suma menciona, y ta considera e acto aki algo serio. Ta un hecho si cu e la wordo declara liber di varios otro cargo, y hopi di e cargonan segun e huez, no por a wordo proba y tambe e la wordo manipula pa Howell y a bay tras di e pensamento cu Howell sa miho y tin un bon reputacion como ex polis y politico y no lo ta capaz di manipule. Si van Putten no cumpli cu e sentencia, e ta haya un castigo di prizon di 60 dia. No ta conoci si e lo apela. Pa e sentencia, click AKI. 

ORANJESTAD – Politico Alan Howel a keda sentencia diabierna na 2 aña di castigo di prizon y tin cu paga un multa di 35.000 florin. Esaki ta trata e caso Diamante unda cu huez a haya legalmente proba di a malversa un suma di 195.404 florin. E hecho cu e tabata un polis den pasado y despues politico a pisa mas pisa contra sr Howell den bista di e huez. Cu e acto aki, segun huez, e la haci daño serio na e confiansa den politica, y mas ainda cu segun e huez, e no ta sinti cu Howell ta conciente di e seriedad di e caso. Abogado di Howell, Doris Canwood a confirma mientrastanto pa Noticiacla.com su cliente a apela e sentencia mesora.  Mientrastanto ta keda den libertad te ora cu situacion cambia.  Por lesa e sentencia AKI. 

ORANJESTAD - Corte Superior a duna instruccion na Ministerio Pubico recientemente pa persigui dos agente policial riba sospecho di homicidio. Relaciona cu e instruccion aki, Ministerio Publico lo cita e polisnan pa presenta dilanti Huez. E caso lo bin dilanti Corte dentro di un tempo.  Asina vocero di Ministerio Publico, Ann Angela a informa diabierna mainta. 

ORANJESTAD – Corte a wanta/pospone e caso di maltrato entre dos yiu di dos politico di Aruba diahuebs mainta, debi cu dos (di e cuater) sospechosonan sea no por tabata presente y of a cambia di abogado ultimo ora. Ta trata di e caso unda cu yiunan di dos politico (un ta yiu di Prome Minister Evelyn Wever Croes y e otronan di politico Micheal Williams) lo a agredi otro fisicamente, causando daño y destruccion y heridando un chef di un restaurant local na 2021. E caso awor ta tuma lugar dialuna mainta 3 di April 2023. E ta remarkable mirando cu ta netamente e yiunan Williams cu no por a presenta y of a cambia di abogado a bringa pa e caso tuma lugar envez di un otro alternativa, pa awor resulta cu ta net pa motibo di nan dos, e caso no por sigui. Di otro banda mester bisa cu e motibo por ta fuera di nan alcanse unda cu abogado a cambia ultimo ora y e otro sospechoso a perde avion. No ta conoci pakico e la perde e avion. 

ORANJESTAD – Corte den un sentencia recien, a rechasa e peticion di Aruba Hotel & Tourism Association (AHATA) pa ahusta e declaracion di impuesto pa turista. Tabata na 2022 cu gobierno di Aruba a cambia e tarifa di impuesto pa turista di 9.5% pa 12.5% entrante 1 di januari 2023. AHATA a indica cu esaki no por pasobra turistanan ta paga nan vacacion delanta incluyendo e impuesto, y cu mester tin un chens pa esnan cu a paga delanta den 2022 aunke ta usa e vacacion den 2023, di por paga e tarifa bieu. Huez di Corte den prome instancia a dicidi cu ta un huez specialisa riba impuesto mester dicidi riba algo asina y mirando cu no ta sigur cu un huez specialisa riba impuesto lo bay di acuerdo den e caso aki, e no por duna AHATA razon y pa cual e ta rechasa e peticion di e gremio hotelero. 

ORANJESTAD  - Ministerio Publico awe mainta a confirma cu awe e  agente policial di inicial V. a keda deteni relaciona cu un investigacion penal. Segun e vocero Ann Angela, no ta exclui mas detencionnan. Di otro banda, Ministerio Publico no kier a duna mas informacion riba e caso ainda.