Paul Croes: Persigui culpabelnan di filma y post pelea di hoben

ORANJESTAD – Si ta pa minister encarga cu hubentud, Paul Croes, e asunto di filma pelea y post nan riba e.o. facebook, mester a disparce ayera. E mandatario a duna NoticiaCla.com un bista di primicia den su plan, cu ta ensera 'converti filmamento y postmento di peleanan di hoben, den un acto castigabel pa ley'. Asina so por ataca e problema explosivo aki mas lihe cu ta posibel. Mientrastanto ,e ta suplica tur esnan cu mira un acto asina, sea e bringamento y of filmamento di bringamento, pa raporta esaki na autoridadnan mesora.

SONDEANDO

E mandatario a splica cu e ta sondeando e posibilidad pa legalmente por persigui esnan cu ta bringa, y /of filma esaki y post nan riba un red social y castiganan den e proceso. Actualmente leynan pa algo asina specifico no ta existi ainda den nos codigo. Pero si ta pa Croes, e kier cambia esaki y elimina henter e asunto aki pa semper. E grupo cu e kier elimina ta netamente esnan cu ta filma y post, cu ta ‘sostene y motiva’ hende pa sigui bringa, y distribui e imagennan aki pa miles di hende. Pa loke ta e bringamento, esaki ta birando mas y mas peligroso, cu e chens cu hende por keda lastima pa resto di nan bida.

CASTIGO

Como prome paso pa logra su meta, Croes a acerca Departamento Social di Aruba, Corsou y St Maarten pa sondea e posibilidad pa legalmente ‘castiga tur esnan cu ta filma pelea’. Tin paisnan cu ta tratando esaki caba, unda cu esnan cu ta filma e peleanan respectivo, ta wordo considera como ‘complice’ di e acto aki y por tambe haya castigo. “E ta e inicio di e proceso aki” Croes a sigui bisa NoticiaCla.com.

TASKFORCE

Ademas, Croes a bisa di ta den proceso pa usa e taskforce cu a wordo crea recientemente durante un reunion di Reino, y unda cu hunto cu minister di husticia, kier trece cambio den ley. “Mi no tin un timeline den cual esaki tin cu tuma lugar” Croes a sigui bisa. E tin sosten di minister di husticia tambe, cu tampoco ta sostene e tipo di actonan baldadi aki. Pa aworaki, no por haci nada na esnan cu ta filma ni post, sino solamente alerta esnan cu mira esaki sosode, y pa raporta esaki na e autoridadnan competente. NOTA: e foto no ta di pelea actual, ni na Aruba. Tampoco e ta tipifica cu ta hende muher so ta bringa, , sino pelea di scol en general como EHEMPEL. Por mira claramente cu den backround tambe tin homber ta bringa.