Detencion den caso maltrato cabesante Filomena College Basis

ORANJESTAD – E prome di posibel varios hoben envolvi den e caso di maltrato na Filomena Basis, a keda deteni. Vocero di polis Lito Lacle a confirma esaki na NoticiaCla.com awe tardi. E hoben F. (15) a keda deteni, riba cargo di ‘openlijk geweldpleging’. Esey ta ora cu un of mas persona comete actonan di violencia den publico, dilanti otro hende. No ta conoci unda e persona a wordo aresta, pero e la sosode ayera nochi.

MAS DETENCION

Segun Lacle, no ta descarta cu den curso di dia awe, lo tin mas detencion cu por cay. Mientrastanto investigacion lo determina si e persona deteni ta e sospechoso principal of no. “Tabatin suficiente gronden pa detene esaki prome” Lacle a bisa. Mes momento e ta asumi cu e lo por ta e persona principal di e grupo di 5.

E CASO MES

Pa loke ta e caso mes di diamars, informacionnan cu tin ta mustra cu un grupo di alumno (posiblemente di e scol mes) lo a subi tereno di scol, tabatin nan cara tapa, y bay riba e cabesante. E cabesante na e momento ey lo tabata serando e scol. Segun Cornelie su informacion, e lo a haya golpi den cara. Informacion confirma cu NoticiaCla.com tin ta cu e cabesante mientrastanto a entrega keho. E la confirma cu e la haya sla, aunke no hopi serio y cu e ta ok.