Dierenbescherming na Corsou a gana caso contra cuater organisacion di cuido di bestia

WILLEMSTAD - Dierenbescherming na Corsou diamars a gana caso kontra kuater organisashon di bestia. E organisashonnan Feed Friends Foundation, Rescue Paws Curaçao Foundation, Stichting Dierenhulp Nederland i Tes Dog Foundation a start kaso kontra di Dierenbescherming, pasobra nan ta kontra maneho di e instansia aki pa ku kachónan ku ta kana rònt riba kaya.

E fundashonnan a eksigí pa Dierenbescherming ehekutá e lei di animal ku aña pasá a keda aseptá den parlamentu i ku porfin e aña aki a keda publiká i asina bira lei. Wes den su sentensia a rechasá tur punto di e fundashonnan, i a indiká ku no ta na Dierenbescherming pa ehekutá e lei òf wak si e lei ta keda kumplí. Esaki ta un trabou di ministerio di salubridat, esta GMN. E fundashonnan no ta di akuerdo ku e santuario ku Dierenbescherming a pone p’asina por fangu kachónan riba kaya. E santuario di Dierenbescherming ta planiá pa bini na Ronde Klip.

Tambe e organisashonnan a bisa wes ku Dierenbescherming tin di hasi distinshon entre kachó di kaya (zwerfhond) i “straathond”. Pa nan e “straathond” tin su doño. E tipo di kachónan aki ta sali for di kurá di nan kas, kana riba kaya, haña kuminda i anochi ta regresá nan kas. Nan ta di opinion ku Dierenbescherming no por fangu e kachónan aki pasobra nan tin doño. Dierenbescherming mester atendé ku e doñonan dje kachó pa tene nan bestia den kurá. Tambe Dierenbescherming mester duna e doñonan di bestia 1 luna di tempu pa nan por será nan kurá i asina e kachó no por sali riba kaya mas. I tambe pone chip na e kachónan. Wes a rechasá tur e puntonan aki, i a duna Dierenbescherming rason den su defensa.

Dierenbescherming tin 70 aña di eksistensia den komunidat di Kòrsou i ta fangu kachu, ta tuma kachó ku hendenan no ke mas, ta sterilisá kachó, ta yuda den adopshon di kachó i pushi. Nan ta haña supsidio, pero pa paga algun trahadó.

CTB t’esun ku a aserka Dierenbescherming pa hasi algu ku e kantidat di kachónan riba kaya, i p’esei a bini ku e santuario. CTB a hasi e petishon pasobra a base di un enkuesta hasí entre turistanan ku ta bishitá Kòrsou, nan a remarká ku Kòrsou ta shushi i tin hopi kachó ta kana lòs riba kaya. NOTA: E texto ta scirbi den Papiamento fonetico di Corsou. Lesa e sentencia AKI