Famia ta conta di e caso di docter asalta y maltrata na Playa

ORANJESTAD – E forma con e caso di asalto di un docter specialista e siman aki a bay, tabata malo den varios aspecto. Manera ta conoci, e siman aki un conocido docter specialista local a keda agredi, atraca y maltrata pa un grupo di malechor. Pero manera e famia a conta NoticiaCla.com, no solamente e atake tabata brutal, pero pa completa e obra, e forma con autoridad a atende cu e caso aki, a laga hopi di desea.

KEDA ANONIMO

E famia a opta pa no uza nomber di e docter den e caso aki, no obstante cu e docter ta un persona conoci. Y den e caso aki, NoticiaCla.com ta respeta e peticion aki. Segun e famia, no ta importante ken e persona ta, sino mas bien e suseso, y mas ainda e forma con esaki a wordo atendi. “E por pasa cu cualkier otro persona” e famianan a splica NoticiaCla.com.

KICO A SOSODE

E docter, riba dicho dia (segun version di e famia) tabata canando su so riba parkeerplaats banda di Kong Hing, ora cu un gang di hoben/teenager a bin den su direccion. “Nan a cuminsa bisa cos y tir’e cu piedra. “E la dicidi di cana bay den direccion di Boolchand’s, pero nan a bin su tras y atake di atras cu un sla duro na su cacumbein (cu un obheto desconoci), cu a causa sangramento na boca”. E ora e la cuminsa core, pero nan a core su tras y hak su pia, (cu a pone cu e la cai). Ora e tabata riba vloer, nan lo a scop e y dal e varios biaha. “E no ta corda si e la perde conocemento un rato”. Despues nan a kita su cartera, telefon (un iPhone), holoshi y bril di dje y cana bay. “Ora cu e la cana bay. Ora e medico a lanta caba bay di e parkeerplaats, e la haya security sinta eybanda, y a puntr’e pa yama polis.

ACTITUD DI POLIS

Ora cu despues di 10 minuut ainda polis no a yega, e docter a dicidi di cana bay direccion di Mojitos, unda cu su casa tabata. “ A haye tur na sanger, y cu cap na frenta y cabez. Despues nos a bay bek abou, unda cu nos a topa auto di polis” e famia ta sigui conta. Segun nan version, esaki ta practicamente 20 minuut despues. Loke ta remarcabel segun e version di e famia, ta cu para na e bentana di e auto di polis e docter a duna un declaracion. “Polis no a ni baha for di e auto, pa check si e (docter) ta ok. Tampoco nan a ofrece pa bay cune den auto, core rond wak si nan ta haya pista di e culpabel nan”. Un dia despues nan a bay na warda di polis na Frankrijkstraat pa haci un denuncia, pero esaki no tabata posibel debi cu ‘e computer tabata down’. “Hopi desapunta nos ta den e cooperacion y actitud di polis” e famia ta bisa finalmente.