Maestronan disgusta pasobra SKOA a hala atencion pa a welga

ORANJESTAD – Tin disgusto entre maestronan di e.o. Filomena Basis y Mavo, pasobra nan lo a wordo ‘atendi’ pa nan decision di ‘welga’ diaranson ultimo durante orario di scol. Segun informacion cu NoticiaCla.com a ricibi, riba e mesun dia di e accion, e docentenan a haya di compronde cu nan lo no haya pago pa e rato cu nan a protesta, ya cu no a pidi nan doño di trabou, Stichting Katholiek Onderwijs Aruba (SKOA) pa permiso.  Directora di SKOA, Jossette Daal no tabata disponibel pa comentario awe mainta.

REGLA PA WELGA

E problema segun NoticiaCla.com a compronde, ta cu pa un accion por tuma lugar y tin e caracter legal, mester participa esaki na nan doño di trabou y posiblemente duna esaki den un termino di 24 ora prome cu e accion tuma lugar. Fuera di esey tin mas rekisito pa tene cuenta cune prome cu bai den accion. Esaki ta pa sigura cu e scol por tuma pasonan na tempo pa no perhudica e alumnonan di e scol. Esaki no a tuma lugar, pa cual SKOA a hala atencion di e maestronan en cuestion, y participa nan di e situacion cu nan ta aden awor. Algo cu nan no ta contento cune. NoticiaCla.com a compronde cu tin mas accion pendiente, aunke no por a bisa kico esaki, ni ki ora y dia esaki lo por ta.  

ACCION DI DIARANSON

Maestronan di Filomena Basis School na San Nicolas a bay den accion diaranson merdia 12'or pa protesta e agresion contra nan cabesante sr Lopez. Nan a haya sosten di parti di nan coleganan maestro di e seccion di MAVO tambe. Tabata algo prome cu merdia cu e maestronan di Filomena  Basis  a a anuncia e walk out awe merdia 12'or . Mientrastanto e maestronan na Aruba a informa ayera cu awe nan lo participa den nan di dos protesta silencioso diaranson, bistiendo un biaha mas na preto. E protesta aki tambe ta un reaccion directo riba e agresion diamars contra e cabesante di Filomena College Mavo. Segun secretario di e sindicato di maestro SIMAR, Maroeschka Cornelie a confirma na NoticiaCla.com, cu nan a tuma nota di e caso lamentable y ta hopi disgusta cu e situacion.

PROTESTA

Segun Cornelie, e accion  tabata pa sostene e cabesante y demostra e malcontento di e maestronan. “Un biaha mas SIMAR ta haci un yamada na tur maestro y docente pa nos sostene nos colega y mustra un biaha mas cu nos ta preocupa y cu nos no por sigui tolera mas abuso y intimidacion di maestro”, e sindicato a pone riba tambe riba nan Facebook page.

KICO A SOSODE

Pa loke ta e caso mes di diamars, informacionnan cu tin ta mustra cu un grupo di alumno (posiblemente di e scol mes) lo a subi tereno di scol, tabatin nan cara tapa, y bay riba e cabesante. E cabesante na e momento ey lo tabata serando e scol. Segun Cornelie su informacion, e lo a haya golpi den cara. Informacion confirma cu NoticiaCla.com tin ta cu e cabesante mientrastanto a entrega keho. E la confirma cu e la haya sla, aunke no hopi serio y cu e ta ok. Foto ta cortesia di team di filomena College Mavo.