Gobierno ta bay den casacion riba ley di matrimonio di mesun sexo

ORANJESTAD – Gobierno di Aruba diabierna atardi a anuncia cu nan a dicidi cu ta bay casacion riba e ley di matrimonio di mesun sexo. Di otro banda, nan ta splica cu lo apela “e punto cu Corte a bay sinta riba stoel di Gobierno”. Di otro banda, gobierno ta bisa tambe cu “ Pa loke ta trata e punto cu si exclui parehanan di mesun sexo di matrimonio ta discriminacion, e conseho ta pa no apela, pasobra e constitucion di Aruba no ta permiti e tipo di discriminacion aki, ni ningun discriminacion”, pues ta haci e asunto un poco ‘mas interesante’ y confuso. 

SITUACION DEN COALICION

Cu e decision aki, e ta crea un situacion interesante den coalicion mirando cu un di e parternan di coalicion ta pro, mientras cu e partner mas grandi (MEP) ta contra. Den e reaccion di gobierno diabierna, e mes ta confirma cu nan partner (Raiz) ta forma parti di e partidonan cu ta sostene e ley.” E cambio di ley pa permiti matrimonio di pareha di mesun sexo, ta den un proceso di legislacion avansa den Parlamento, cu e ley di iniciativa di partidonan Accion 21 - Raiz - Mas, y e tratamento di e ley ta den man di Parlamento” e comunicado ta sigui bisa.

E CASO 

Gobierno a recorda tambe cu tabata despues di a ricibi e veredicto dia 6 di december 2022 den e caso di matrimonio di pareha di mesun sexo, cu Gobierno a busca conseho prome cu dicidi di apela, e asina yama “cassatie advies”.  A base di esaki Gobierno di Aruba a tuma e decision di bay den casacion contra e punto cu Corte a bay sinta riba e stoel di un gobierno. Ta importante pa haya claridad si e forma con Corte a duna contenido na e “rechtsvormende taak”, ta corecto. 

DECISION DIFICIL

E no tabata un decision facil segun gobierno mirando e situacion cu esaki ta crea awor den coalicion, y ta keda pa wak con Raiz lo reacciona y vota ora cu e ley bin dilanti pa votacion durante su tratamento.