Aruba y Hulanda a cuminsa dialoga riba refinanciamento, repago di e debe y COHO

ORANJESTAD - Gobierno di Aruba diahebs a cuminsa cu e dialogo cu Secretario di Estado Hulandes Alexandra van Huffelen riba e tema di refinanciamento y repago di e debe cu Aruba tin cu Hulanda. ASina Gobierno di Aruba a informa diahuebs. Manera ta conoci, durante pandemia Hulanda a fia Aruba 915 miyon florin pa Arubapor a sigui draai. Segun e prome mandatario Evelyn Wever Croes, e debe ta vence na October di 2023 (e aña aki) y mester cuminsa papia riba e repago. “Prome cu e reunionnan a cuminsa nos a cuminsa papia riba e posibilidad di repago, e termino, e interes y e temporada etc. Na luna di maart lo bin un delegacion pa sigui cu e conversacionnan aki. Mi tin tur confiansa cu nos ta bay keda cla cu e tema aki pronto”, Prome Minister Evelyn Wever-Croes a duna di conoce. 

COHO

Un otro tema cu tambe a wordo trata cu Van Huffelen ta e tema di COHO. Na januari ultimo durante e reunionnan entre e paisnan di Reino na Sint Maarten a yega na un acuerdo cu ta kita e COHO for di mesa y na su luga ta bin e ‘onderlinge regeling’ di cual tabata falta algun detaye cu mester a wordo finalisa. Prome Minister a indica cu e trabounan aki tambe ta kedando cla pa otro luna firma esaki. 

BON COMBERSACION

“Combersacionnan ta bayendo bon. Naturalmente tin mas tema pa discuti. Importante ta pa compronde otro bon pa e aña aki ta uno exitoso pa Aruba. Den union y cu hopi positivismo nos lo logra tur loke nos propone na bienestar y prosperidad di nos pueblo”, Prome Minister Evelyn Wever-Croes a expresa.