Paro di benta di refineria tin gobierno keto y oposicion rabia

ORANJESTAD – E decision di Valero pa no bende e refineria na Aruba mas, a hala hopi atencion ayera. For di momento cu e noticia a keda conoci (y confirma pa Valero na NoticiaCla.com), reaccionnan tabata hopi. Di parti di gobierno sinembargo, tin un silencio hermetico riba e topico aki. Varios intento di NoticiaCla.com pa papia cu e mandatario di energia no a duna resultado. Mientrastanto di banda di oposicion si tabatin critica riba e asunto, mirando cu for di comienso nan a vocifera nan malcontento cu e idea di sera y desmantela.

PALABRA NA GOBIERNO

Segun lider di e partido geel, esta Evelyn Wever Croes, e palabra ta na tanto ministernan Mike Eman y Mike de Meza. “ Nan mester actua, pasobra no ta un multinacional ta esun cu mester dicidi si ta elimina un pilar economico na Aruba. Esey ta un decision di Gobierno” tabata e prome reaccion di e lider di oposicion na NoticiaCla.com. Segun Wever, e ta spera tambe cu Gobierno duna cara awo, pasobra awor tin prueba cu tin cumprado interesa. Pero mes momento Wever ta mustra cu e ta kere cu ‘ta Valero ta hasiendo wega’. “Lider di Fraccion di AVP varios biaha a bisa nos cu si nos tin cumprado, manda nan San Antonio, Texas. Y awor nos ta mira ta dicon ningun por a bira realidad: pasobra Valero ta hunga wega” e lider di oposicion ta sigui bisa.

ENTREGA TERMINAL BEK

E pensamento di Wever Croes ta cu gobierno mester step up awor y condena y rechasa esaki. “Nos no ta papiando di un tienda cu ta dicidi di sera y no bende, no! Nos ta papiando di full un pilar economico y Valero no a actua di buena fe y no a hasi suficiente pa bende. Esaki ta e momento cu Gobierno mester pone orden: bisa Valero, sea bo ta bende, sea bo ta entrega e terminal bek”. E lider di partido heel ta uza e dicho ingles "You cannot have the cake and eat it too".

INTERES

Si Gobierno no reacciona y condena e actitud aki di Valero, e lo ta un confirmacion pa Wever Croes, cu Mike Eman y Mike de Meza ta cumpra, y nan ta meti den e cos aki. “Y nan no tin interes pa habri e refineria”. Nan a gaña henter e pueblo. Pasobra no por ta asina cu mientras tin interes pa re-apertura di e refineria, nan ta sinta y permiti Valero turn away tur interesado. Si nan no condena e cos aki, nan ta meti den e wega. Y si esey ta e caso, ami ta cuminsa studia e RICO-Act riba 'foreign corruption' pasobra aki ta wega ta wordo hasi entre un multi-nacional y algun gobernante, cu ta perhudica henter un pueblo. Foto cortesia arubachamber.com