Lopez-Tromp: Ta trata presupuesto 2015 ‘per minister’ envez di hunto

ORANJESTAD – Tratamento di presupuesto 2015 di pais Aruba ta cuminsa probablemente otro siman. Probablemente pasobra ta depende con lihe contestanan di gobierno drenta Staten. “Mester warda esakinan drenta prome” presidente di parlamento di Aruba Marisol Lopez Tromp a confirma na NoticiaCla.com awe mainta. Y mirando tur loke tin cu haci, Lopez ta premira cu e tratamento lo por bay dura te drentando luna di mei. Esaki pasobra lo trata e presupuesto diferente e aña aki. E atencion riba presupuesto ta mas halto, mirando cuanto presion tin riba gobierno, pa esaki cumpli cu tur rekisito. Y mas aun pa evita loke a sosode aña pasa ora cu gobernador no a firma esaki sino te practicamente fin di aña. Y cu esaki na bista, kier duna e presupuesto tur su debido atencion, y no pasa cos pura pura manera antes. 

CONTESTA

Lopez a mustra cu e contestanan (por escrito) di gobierno no a drenta Staten, y tampoco e nota di cambio di gobierno, Raad van Advies su reaccion y otronan. “Ta ora cu gobierno entrega su contestanan riba Staten vragen, e ora mi por stipula e fecha. Pero nan no a drenta ainda “ Lopez a sigui bisa.

SEÑOREN CONVENT

Den cuadro di esaki, Lopez a tene un Señoren Convent ayera, esta un reunion entre Lopez como presidente di parlamento, y tur lider di fraccion, esta cu Herde di AVP, Wever Croes di MEP y Bikker di Democracia Real. Durante e reunion ey, a palabra e forma con lo trata e presupuesto. Entre otro a dicidi cu e biaha aki lo trata e presupuesto pa minister, y no hunto manera prome. A palabra tambe e cantidad di tempo cu cada orador tin. “Y nos a yega na un palabracion cu nos tur ta di acuerdo cune” Lopez a sigura NoticiaCla.com.

PER MINISTER

Pues e cambio e aña aki ta cu (manera tabata haci algun tempo) ta bay trata e presupuesto, invitando e ministernan un pa un, (dus no hunto manera antes). E motibo segun Lopez ta simpel. “Mi kier pa nos trata e begrotingnan den tur profundidad y cu nos por focus riba e begroting di cada minister, paso cada un ta carga un responsabilidad ministerial” Lopez a sigui bisa.

RETRASO PRESUPUESTO

Pues e intencion ta pa start otro siman, y mirando cuanto cos falta, e por sigui te den luna di mei segun Lopez. Segun Lopez, parlamento mester tin su espacio pa tur miembro por trata e presupuesto seriamente. “ No ta pasobra cu begroting a wordu entrega 7 luna laat, Staten lo tin cu bai lomba contra muraya pa trate den anshamento. Staten no mester ta bou presion di tempo cada vez” Lopez a finalisa bisando.