Michel Henriquez ta mantene su funcion como presidente di ATIA

ORANJESTAD - Manera ta conoci, den e prome reunion oficial di directiva di ATIA ta vota riba e funcionnan den e directiva cual ta chairman, secretario, tesorero y vice-chairman. Sr. Michel Henriquez a wordo reeligi como chairman. Henriquez no ta un desconoci den comunidad comercial. Michel Henriquez ta un miembro cu tin varios aña den directiva di ATIA y actualmente ta CEO di Manrique Capriles. Obhetivo di Henriquez ta pa sigui cu e vision di ATIA esta pa agrega balor na e miembresia door di sigui expande servicio y informacion relevante na e miembronan. Na prome luga Henriquez lo kier sigui yuda e miembronan desaroya y despues comercio en general. Pa e proximo periodo Henriquez lo percura pa sigui delibera cu gobierno pa mehora e posicion di dunadornan di trabou y lo sigui haci tur esfuerso pa gasto di haci negoshi no sigui subi. Alavez trece incentivonan pa crece negoshi local y pa crea asina mas empleo y inversion den nos economia.

Durante reunion di directiva, Sr. Tito de Cuba a wordo reeligi como secretario, Sr. Jim Hepple a wordo reeligi como tesorero y Sr. Ronnie van Trigt a wordo reeligi como vice-chairman. E tres funcionnan aki hunto cu e chairman ta forma e Daily Board di ATIA.

Manera conoci, e directiva di ATIA pa 2015 - 2016 ta conta cu 11 miembro profesional procedente di varios segmento den nos comercio y ta consisti di Sr. Michel Henriquez (wholesale / salubridad), Sr. Ronnie van Trigt (mantencion), Sr. Roland Croes (telecomunicacion), Sr. Tito de Cuba (recurso humano), Sr. Jim Hepple (turismo), Sra. Gina Habibe (bancario), Sra. Indira Solognier (finance / accounting), Sr. Ravee Nandwani (retail), Sr. Folkert van der Woude (construccion), Sra. Mireille de Miranda (impuesto) y Sr. Donald de Veer (transportacion / logistica).