De Meza: Gobernador no a cumpli cu su palabra

ORANJESTAD – “Ni Gobierno di Reino ni Gobernador a mantene nan mes na palabracion haci". Na palabra minister Mike de Meza riba e hecho cu gobernador di Aruba ainda no a firma e presupuesto. De Meza a duna su reaccion diamars atardi, indicando cu ta cuestiona e hecho cu ainda gobernador no a firma, siendo cu premier Mike Eman si a cumpli cu su parti di e ‘deal’. Segun de Meza ‘Prome Minister a para esaki a base di palabracionnan cu a wordo haci’, pero cu e otro partidonan (gobierno di Reino y gobernador) no a cumpli.

Segun de Meza, no ta pidi gobernador pa haci algo pa gobierno di Aruba, sino pa e cumpli cu ley. E mandatario ta mustra cu nan a haya ‘siguransa di gobernador Refunjol, cu dialuna (ultimo) Aruba lo a haya claridad y cu un decision lo wordo tuma. Esey awor no ta e caso. “Tur aspecto rond di e welga di hamber y compromisonan cu a wordo haci, ta bay wordo treci dilanti den un discurso nacional cu Prome Minister Mike Eman lo tene diaranson anochi” de Meza a sigui bisa.

“Den e discurso ey, Prome Minister lo splica tur cos cu a pasa e ultimo lunanan y lo duna un claridad total riba tur e decisionnan cu a wordo tuma pa pueblo Aruba haya sa den detaye kico tur a tuma luga den contacto den e problema aki." E ta mustra tambe ademas cu henter e situacion cu a surgi no tin muestra di democracia, ya cu institucionnan mas halto den Reino no a respeta Statuut ni reglamento pa gobernador, y sin caminda pa cana, ta haci cu mester discuti e problema aki publicamente.

Segun de Meza, ta prome biaha na mundo cu un instituto ta "secuestra" un presupuesto y hinca esaki den lachi, perhudicando e pais enormemente. “Lamentabel den esaki, e Ministernan ta carga responsabilidad cu no por cumpli e ultimo dos lunanan cu fundacionnan p.e y no gobernador, kende ta esun cu no ta firmando e presupuesto” de Meza ta finalisa bisando.