Na Corsou, RDK a para tur combersashon cu CPR riba maneho y operacion refineria y Bullenbaai

WILLEMSTAD - Ayera durante reunion ku ehekutivonan di Caribbean Petroleum Refinery (CPR), Refineria di Kòrsou (RdK) i tambe gobièrnu a informá CPR) ku e ta terminá e kombersashonnan tokante maneho i operashon di e refineria i Bullenbaai. RdK a informá CPR na mes momentu ku no ta konsiderá CPR komo ‘preferred bidder’ mas den e proseso aki, i konsekuentemente lo no kombersá ku CPR eksklusivamente mas. E kòntrakt di hür di e tankinan na Bullenbaai dor di CPR entretantu si a keda prolongá i lo kontinuá di akuerdo ku e kòntrakt.

Djaluna durante reunion tokante dokumentonan falsifiká den asuntu negosiashonnan pa refineria, promé minister Gilmar Pisas a anunsiá ku ayera Refineria di Kòrsou i gobièrnu lo informá CPR di nan desishon riba e asuntu aki. Sr. Pisas a bisa di ta spera ku e outoridatnan di CPR lo yega Kòrsou pa reunion i no atrasá esaki. esei a sosodé ayera. E motibu prinsipal ku a para ku e kòmbersashonnan ku CPR ta denunsiánan ku tin den nan kontra pa dokumentonan falsifiká. Tin denunsia di un siudadano, dos denunsia di Banko Sentral i tambe RdK a entrega denunsia i otro petishon di denunsia kontra di CPR. Djaluna tambe promé minister a bisa a pone tur kos “on hold” ku CPR. Pero ayera ta anunsiá ku a para tur negoshashon.

Esaki ta di sinku baha ku negosiashonnan pa ku apertura di refineria ta frakasá. Esaki ta di dos kaso ku tabatin kosnan ilegal ku a tuma lugá, i kual a kosta esnan ku ta negoshá, paso nan a kai sera i risibí kastigu di prisòn.

Finalmente RdK ta bisa ku unabes ta asina leu, lo informá komunidat di e siguiente pasonan ku lo tuma den kuadro di aktivashon di nos refineria.

Djaluna tambe promé minister a lansa un pensamentu ku lo por bai traha ku CUROIL pa yena e bashí ku a surgi awor ku a para tur negoshashon ku CPR. NOTA: Texto ta scirbi den Papiamento fonetico di Corsou.