ATIA: Gobierno mester ehecuta reforma fiscal y balansa awor

ORANJESTAD - Esaki t'e momento oportuno pa ehecuta e reformanan necesario y na un manera balansa. Esey ta pensamento di e gremio comercial mas grandi di Aruba. ATIA representando comercio, a informa awe cu nan ta na altura di e plannan di Minister di Finanzas encuanto reformanan fiscal, cual ta entre otro introduccion di Algemene Bestedingsbelasting (ABB) na 2016 y ahustacion di tarifa di loonbelasting / inkomstenbelasting (IB) na 2017.

MOVECION DI IMPUESTO

Ya pa varios aña ATIA ta boga pa un movecion di impuesto directo pa uno indirecto, cual ta un tendencia internacional y algo cu IMF tambe tur biaha ta subraya. E cambio pa impuesto indirecto lo trece miho control di entrada pa gobierno; lo subi entrada di gobierno paso tur hende lo paga nan fair share; lo baha e peso financiero pa e individuo (paso turistanan, ilegalnan, etc. tambe lo paga impuesto); lo baha gasto di compliance pa tanto gobierno como comercio.

Reduccion di impuesto riba ganashi

ATIA ta satisfecho di wak cu tarifa di impuesto riba ganashi lo baha di 28 % pa 25% desde 1 januari 2016 y despues te cu 20% desde januari 2017. Esaki sigur lo duna comercio e debido espacio pa inverti, pa crea mas cupo di trabou y pa recompensa p’e introduccion di ABB. Pa es motibo ATIA ta aplaudi ehecucion di e reformanan fiscal presenta. Sinembargo e plan di Minister di Finanzas ainda no ta concretisa, pesey ta mira espacio pa trece precupacionnan dilanti.

Evita inflacion y stagnacion di economia

Na prome luga gobierno no por sigui aumenta impuestonan sin mas. Introduccion di ABB na januari 2016 mester tuma luga simultaneamente cu ahustacion di tarifa di IB, sino esaki lo crea (mas) inflacion y crecemento economico lo keda atras. Pues ATIA ta spera cu ambos pasa den un biaha, no cu e gastonan pa individuo ta subi na 2016 y te na 2017 ta haya compensacion.

ATIA ta di opinion cu gobierno a yega e momento di awo of nunca. Cu un minister di finanzas asina experencia riba e tereno aki; cu un Hulanda poniendo presion riba gobierno; cu un finanzas publico desbalansa, no ta sobra niun otro conclusion cu esaki t'e momento oportuno pa ehecuta e reformanan necesario y na un manera balansa.