Cuestionamento rond nombracion director nobo pa belasting y pa aduana

ORANJESTAD – Nombracion di hefenan nobo na tanto aduana como dept di impuesto rapidamente a haya un tinte menos positivo. Esaki  ora cu a bira conoci, no cu tanto servicio di aduana como esun di impuesto tin un hefe nobo otro luna, sino ken nan ta. Un ‘besluitenlijst’ cu NoticiaCla.com tin den su poder, ta mustra cu basa riba conseho di un comision, dia 14 di april, a nombra Roderick Croes como e director general pa servidio di aduana y srta L. Pieters como e director general di servicio di impuesto. Ambos departamento ta resorta bou di minister di finanza Angel Bermudez. Ambos persona ta haya asistencia temporal pa un periodo di 1 aña. 

CONSEHO DI MINISTER

Tabata siman pasa cu Bermudez a confirma na NoticiaCla.com cu e siman aki e nombracionnan lo cay, y tabata den conseho di minister diamars ultimo cu esaki a keda aproba. Mientras cu e intencion tabata pa un comision independiente di experto, guia pa un compania di accounting atende e proceso, e resultado a genera un ola di reaccion serca esnan serca di e proceso. Esaki pasobra tin informacion cu algun di e personanan aki lo no tin e capacidad y preparacion pa e funcionnan aki. NoticiaCla.com no por a confirma esaki pero e informacionnan tabata basta persistente. A busca contacto cu e mandatario en cuestion, pero no a logra te ainda. Ambos persona ta cuminsa nan funcion nobo entrante 1 di mei proximo y ta gosa di e respectivo beneficionan y salario conforme e funcion. Foto cortesia bondia.com