Hooyboer: E realidad di reduccion presupuesto enseñansa

ORANJESTAD – Ningun momento a reduci presupuesto di enseñansa y asina perhudica e.o. seguridad pa scolnan. E mandatario encarga cu enseñansa Michelle Hooyboer diahuebs atardi a splica NoticiaCla.com cu e informacionnan circulando riba e asunto aki ta totalmente falso e incorecto. Simplemente a re aloca fondonan na unda cu mas mester di dje, sin cu ta perhudica seguridad pa ningun scol. E polemica ta algo crea pa partido MEP, y e mandatario ta lamenta esey. Esey no ta kita afo cu enberdad a rebaha e presupuesto, pero no manera cu e ta wordo presenta.

GASTO AL CASO

Segun Hooyboer, den presupuesto 2015 a reduci cierto gastonan debi cu nan no tabata ‘al caso mas’, manera e servicio di cacho di seguridad. A elimina e gasto ey debi na su inhabilidad pa percura pa seguridad efectivo. Como cu e tabata algo costoso y no productivo, a elimina e parti aki.

CEA

Na otro lugarnan a elimina seguridad debi cu e situacion a cambia di tal forma sea cu e edificio no tabata den uso mas (a muda e respectivo scolnan pa nan respectivo localidad nobo), y otro tabata cu a uza servicio di CEA. Y ora cu uza servicio di Cuerpo Especial Arubano (CEA) , automaticamente e ta cay bou di otro post, cu ta esun di husticia.

RE-ALOCACION

De hecho, segun e mandatario tin otro caminda cu a aumenta e seguridad y a haci esaki basa riba e ‘re alocacion’ di tanto personal como fondo. Como tal e ta ‘parse’ cu e suma a keda reduci y sin splicacion esaki por mustra incorecto. Pero e mandatario a sigura NoticiaCla.com cu durante tratamento di presupuesto, lo duna un splicacion amplio y mustra cu ningun momento a perhudica e scolnan. Loke ta sosode segun e mandatario, ta cu e partido opositor ta haciendo politica, cu no ta conduci na nada positivo. Nan lo mira cu a triplifica e gastonan di seguridad for di 2010 pa 2015.