Pa final di 2024, tur cas na Aruba lo mester ta conecta na un smart meter

ORANJESTAD -  Pa final di 2024, tur cas na Aruba lo mester ta conecta na un smart meter. Pa esaki sosode, bo mester ta conecta awor na e red di e compania cu ta suministra coriente esta NV ELMAR. E compania su vocero, Audrey Croes a raporta recientemente cu mientrastanto, mitar di e clientenan di ELMAR  te awor,esta un total di 50% di nan 43 mil clientenan, tin Smart Meters caba. Un dato sigur interesante cu Croes recientemente a comparti publicamente. Y e grupo aki cu tin smart meters, lo aumenta segun Croes ya cu nan (ELMAR) a sigura cu nan lo ta hopi activo instalando mas Smart Meters riba e isla. Loke ta interesante ta cu e implementacion di un smart meter no ta rekeri ningun accion di parti di e cliente. E suministro di coriente lo continua di un forma normal. Segun Croes, nan intencion ta pa cambia tur meter pa un smart meter pa fin di 2024. Pero debi na e pandemia, e proyecto a conoce un retraso. Mientrastanto tur cliente cu a aplica pa un meter nobo a ricibi un Smart Meter y e meternan cu no ta accesibel pa wordo lesa facilmente a wordo cambia pa Smart Meter. Segun Croes, ta depende si Elmar ricibi tur carga di smartmeters pa por cumpli cu nan schedule. 

SMART GRID

E intencion, segun Croes, ta pa ELMAR crea un Smart Grid. E meternan moderno aki ta facilita esaki. E Smart Meters ta comunica y provee informacion tocante di e meternan riba un punto di acceso. E ta permiti e compania pa  monitoria e uzo di energia den tempo real. Si tin un problema cu e red of riba e red unda cu tin Smart Meters, nan ta haya un alarma inmediatamente for di e meter. Locual ta permiti nanidentifica problema mas lihe y resolve nan mas eficiente. Esaki ta permiti nan brinda informacion mas preciso tocante e uzo di energia na nos clientenan. E Smart Meter ta ricibi e “meterstand”, esta e uzo di cliente, via un sistema wireless.