Hooyboer: Prome cu fin aña escolar lo alivia mayoria problema

ORANJESTAD – Despues di dos ora di reunion, tanto sindicato Simar como minister di enseñansa Michelle Hooyboer Winklaar ta sinti cu pasonan grandi a wordo tuma na bienestar di enseñansa. “Nos ta parti di e mesun team” e mandatario a sigura NoticiaCla.com despues di e reunion largo. Segun e minister, e grupo grandi di como 30 maestro a haya chens pa ricibi informacion, y ventila nan puntonan di un forma serio y na un nivel halto.

REUNION SPONTANEO

E mandatario a splica NoticiaCla.com cu e encuentro tabata uno spontaneo, den sentido cu ambos banda no tabata sa kico pa spera. Pa sorpresa di e grupo di maestra, enves di selecta un comision pa representa nan, e mandatario a dicidi di invita e grupo completo (mas di 30 maestro) pa drenta den e sala grandi di reunion di conseho di minister pa asina tende nan preocupacion y duna nan su version.

PUNTONAN DISCUTI

Entre e puntonan discuti, a toca e agresion na Filomena Basis aunke no a bay den detayes, sino mas bien kico mester sosode pa remedia e problema. A aproba mesora pa pone un seguridad pa tanto Basis como Mavo den dia. Esaki pa motibo di vandalismo cu a sosode den e dianan cu a pasa (kibra y horta e pipanan di koper).

MENSAHE

E mensahe cu cual e maestronan a bandona e reunion, ta cu lo tin mas occasion pa topa otro asina y vocifera esaki y bin cu solucion. Tur maestro a haya chens pa duna nan precupacion, cu na final a resulta cu e reunion a tuma su tempo, esta 2 ora completo.

COMISION

A keda cu dentro di un siman ta forma un comision cu ta keda encarga pa prome cu comienso di proximo aña escolar, resolve mayoria di e problemanan.