Extencion 'estadia turistico' automatico no ta valido mas

ORANJESTAD - E medida temporario pa un extension di estadia turistico "automatico" a finalisa entrante 15 april 2015. Un turista cu bin pa bishita Aruba, ta haya for di autoridad di emigracion di Aruba na frontera (IASA) -si e ta cumpli cu tur rekisto - in principio un estadia 30 dia pa permanece na Aruba. 

Solamente e turistanan cu tin propiedad inmobil (por ehempel cas, timeshare, condominium etc) na Aruba of tambe e turistanan cu tin nacionalidad Hulandes, tin e posibilidad - riba nan peticion por medio di e ED card - pa obtene for di autoridad di emigracion di Aruba na frontera, di biaha, un maximo di 180 dia consecutivo y pues no mester pasa DIMAS pa regla un extension di estadia turistico. Den caso cu e turista por lo general tin e intencion di keda mas largo cu e termino aproba pa emigracion na su entrada, e turista por acudi na DIMAS pa tramita su aplicacion pa un extension di su estadia turistico. E medida temporario cu Minister di Integracion a stipula desde aña pasa, cual ta ensera cu e turista por a keda maximo 90 dia sin pidi extension di estadia turistico na DIMAS, a finalisa manera anteriormente anuncia dia 15 di april 2015.

E formularionan cu lista di rekisito pa cu e aplicacion di un extension di estadia turistico ta disponibel online, 24/7, riba website di DIMAS: www.dimasaruba.aw y por ser entrega na DIMAS. Clientenan lo ser atendi pa DIMAS segun e orden di yegada‎.