Valero: No ta bende e refineria na Aruba mas !

SAN ANTONIO – Refineria di Valero na Aruba no ta na benta mas! Esaki a keda confirma awe mainta na NoticiaCla.com pa e vocero oficial Bill Day for di San Antonio, Texas. “No tin ningun proceso andando pa bende e refineria y no ta anticipa ningun benta” Day a confirma y bisa mesora cu e refineria como tal no ta na benta mas. E motibo di pregunta tabata un carta di ‘rechaso pa benta’ cu NoticiaCla.com a nota cu ta circulando. E carta ta unda cu Valero ta contesta un compania cu nan no ta na benta mas. Ta aki NoticiaCla.com a tuma contacto cu e refineria, cu e contesta menciona.

FALTA DI CUMPRADO

Day a bay mas specifico den e caso. “Ningun cumprado cualifica a presenta durante e periodo di 7 aña cu e refineria tabata na benta” Day a confirma na NoticiaCla.com. “Como tal Valero ta continua cu su compromiso pa desmantela e refineria di Aruba y limpia e tereno pa gobierno di Aruba” Day a sigui bisa. “Como tal e sitio lo ta limpi pa fin di e aña aki”. Esaki ta un cambio di pensamento y maneho for di ultimo biaha cu NoticiaCla.com a raporta e noticia aki.

DESMANTELA Y BENDE TOCH

Algun luna pasa, NoticiaCla.com a raporta cu e Valero a inicia e proceso di desmantelacion di e refineria na Aruba, door di e.o. percura pa busca companianan interesa pa medio di un destaho publico, pa haci e trabou di desmantelacion. Despues a mustra cu nan a cuminsa benta di cierto ekiponan grandi tambe. Sinebargo na e momentonan ey, nan a sigura cu no obstante esey, nan ta sigui cu e proceso di benta di e refineria. Esey aworaki a cambia, y a sigura y confirma cu no ta bende e refineria mas. Por lesa e carta di peticion pa cumpra aki, y esun di rechaso aki