Homber a asesina su propio doño di trabou na Corsou

WILLEMSTAD - Kòrsou a registrá e promé kaso di asesinato pa aña 2023. Esaki despues ku un hòmber a asesiná su propio doño di trabou. Ayera alrededor di binti pasa di kuater, Sentral di polis a risibí yamada di un hòmber ku a indiká ku el a kaba di asesiná su doño di trabou na un establesimentu riba Cas Coraweg. Na yegada di e promé unidat polisial a topa ku un hòmber ku herida di bala parti ariba di su kurpa i ku no ta duna señal di bida. Dòkter di polis a yega na e sitio i a konstatá morto di e víktima.  Ora polisnan a yega na e establesimentu kual ta un negoshi di tayer, a topa ku e hòmber doño dje establesimentu benta den un stul ku tin den e ofisina.

Alrededor di sinku pasa di sinku di atardi un unidat di UST a detené e hòmber sospechoso A.M.B.T., di 30 aña di edat nasé na Venezuela, na su kas den área di Fuik relashoná ku e kaso di asesinato ariba menshoná i violashon di lei di arma di kandela. E mes a indiká polisnan na unda e ta pa asina e por entrega su mes.

A presentá e sospechoso dilanti un fiskal ouksiliar ku despues di interogashon a ordená su  enkarselamentu pendiente di mas investigashon.

E kurpa dje víktima a wòrdu konfiská riba òrdu di Fiskal di Ministerio Públiko pa mas investigashon. Kuerpo Polisial no a duna identidat di e víktima ainda. NOTA: E texto ta scirbi den Papiamento fonetico di Corsou.