Minister y Simar ta reuni awe pa discuti agresion den enseñansa

ORANJESTAD – Minister di enseñansa Michelle Hooyboer Winklaar ta reuni awe tardi cu miembronan di sindicato SIMAR riba un posibel solucion pa e forma di agresion na scolnan na Aruba. Prome cu esey, un grupo di maestro lo marcha di Wilhelmina Park rumbo pa e edificio di Cocolishi y compaña miembronan di directiva di e sindicato, prome cu nan reunion. Despues di e reunion tanto minister como e sindicato lo duna un splicacion di e resultado di e reunion aki. For di e mandatario, NoticiaCla.com a compronde cu e contenido di e reunion, 'tin cu inclui e creacion di un protocol cu tin cu percura pa haci scol liber di termento, intimidacion, violencia y agresion'. 

ACCION AYERA

Tabata ayera cu maestronan di Filomena Basis School na San Nicolas a bay den accion pa protesta e agresion contra nan cabesante sr Lopez. Nan a haya sosten di parti di nan coleganan maestro di e seccion di MAVO tambe. Tabata algo prome cu merdia cu e maestronan di Filomena  Basis  a a anuncia e walk out awe merdia 12'or . Mientrastanto e maestronan na Aruba a informa ayera cu awe nan lo participa den nan di dos protesta silencioso diaranson, bistiendo un biaha mas na preto. E protesta aki tambe ta un reaccion directo riba e agresion diamars contra e cabesante di Filomena College Mavo. Segun secretario di e sindicato di maestro SIMAR, Maroeschka Cornelie a confirma na NoticiaCla.com, cu nan a tuma nota di e caso lamentable y ta hopi disgusta cu e situacion.

PROTESTA

Segun Cornelie, e accion di ayera tabata pa sostene e cabesante y demostra e malcontento di e maestronan. “Un biaha mas SIMAR ta haci un yamada na tur maestro y docente pa nos sostene nos colega y mustra un biaha mas cu nos ta preocupa y cu nos no por sigui tolera mas abuso y intimidacion di maestro”, e sindicato a pone riba tambe riba nan Facebook page.

REUNION MINISTER

E secretaria di SIMAR a confirma tambe na NoticiaCla.com cu awe nan lo sinta cu minister di enseñansa Michelle Hooyboer Winklaar, ‘pa papia di e topico y wak kico nos ta bay haci’. “Nos ta pensando den escala accion” Cornelie a confirma na NoticiaCla.com diamars anochi. Pero e la clarifica cu e accion e biaha aki no ta contra minister, pa no bruha cuenta. “E ta mas bien pa concientisa, spierta comunidad”.

KICO A SOSODE

Pa loke ta e caso mes di diamars, informacionnan cu tin ta mustra cu un grupo di alumno (posiblemente di e scol mes) lo a subi tereno di scol, tabatin nan cara tapa, y bay riba e cabesante. E cabesante na e momento ey lo tabata serando e scol. Segun Cornelie su informacion, e lo a haya golpi den cara. Informacion confirma cu NoticiaCla.com tin ta cu e cabesante mientrastanto a entrega keho. E la confirma cu e la haya sla, aunke no hopi serio y cu e ta ok. Fotonan ta cortesia di team di filomena College Mavo.